Khliehriat, Nailur, 02: Ka Khasi Students Union (KSU) East Jaiñtia Hills District ka pyrshah jur ïa ka public hearing jong ka Meghalaya Cement Limited ban sa long ha ka 5 tarik mynta u bnai ha Chihruphi, East Jaiñtia Hills District kumba ladep pynbna da ka Meghalaya State Pollution Control Board (MSPCB).
Halor kane ka jingpyrshah ka seng ha ka Lah Sngi u Blei ka la aiti da ka dorkhas ha u Deputy Commissioner ka East Jaiñtia Hills District.
Ka jingpynlong ïa ka public hearing ka long halor ka jingthmu ban khlong ïa u mawshun na Mooiong-Thlusniang, Chiehruphi, na ka jaka kaba heh 26.5 hectare.
Ha u kyrwoh ka KSU ka la ong, “ki lum ki la syllen, ki wahduid ba sngur ki la tyrkhong, ka lyer ka la kylla bih, ka jingshit kyrang ka la nang kiew. Ah! Kordit ïa ka thaiñ Narpuh, shaei ki khlaw ba bren, ki jingpah ki sim, kaei ka ban sa jia ïa ka pateng ban wan, sa katno tylli kita ki public hearing pynjot mariang kaba ki trai shnong ki ailad. Ka Seng ka pang ruh ka mynsiem ban kynmaw ïa kato ka public hearing ba ladep ha kane kajuh hi ka kompeni Topcem ha kaba ki Pulit ki la shoh ki bom khlem jingisynei ïa ki kynthei, ki khynnah. Ka jingpyrta pynjem rgniew ki mynder bar jylla ïa ka jaidbynriew da kaba ong “maro maro sale ko, khatom karo usko.” Ah! Ka lanot sepsngi, hato kine ki paradoh para snam jong ngi kiba ai jingkyrshan kim kynmaw shuh mo ïa kato kaba ladep jia. Ngi la long ki mraw ha la ka ri.”
Ha ka dorkhas ba la soi da u President ka KSU East Jaiñtia Hills u Bah Streamly.N.Suchen bad u General Secretary u bah K.S Suchiang, ka seng ka la ong, “lada ngi shah ban khlong ïa ki marpoh khyndew na katei ka jaka kan sa don ka jingktah ïa ka mariang bad ïa ka pateng ka ban sa wan, ngi la ioh mad ba ka la don ka jingkiew ka jingshit hapoh ka Elaka Narpuh bad kane ka dei naduh ba wan ki karkhana dewbilat hapoh Elaka Narpuh bad kane ka wanrah ka jingsngewkhia kaba khraw khamtam mynta ka la don ka jingkiew ka jingshit ha ka pyrthei baroh kawei.”
“Ka jingpyrshah jong ka seng ka dei ruh ba kane ka jingkhlong ïa u mawshun kan buh jingeh bad buh jingma ym tang ïa ki briew hynrei ïa ki mrad ha khlaw bad ruh ki kynbat dawai kiba don ha khlaw namar ka long ka jingshisha ba ïa ka Narpuh la kyrkhu da ka jingdon ki khlaw kiba rben, ki jaka kiba itynnad, ki lum ki wah ba itynnad ki ban khring ïa ki nongjngohkai pyrthei bad kumta ka seng ka pyrshah jur ïa kane ka jingthmu ban khlong ïa u mawshun,” ong ka KSU.
