Pyrshah jur ba shah khot hajir u General Secretary Weng ïa baroh ki jingpynngat kyndon lym kumta ngin weng na ka miej jingïakren maham ka HNLC

Shillong Nailur 03: Ka Hynñiewtrep National Liberation Council (HNLC) ka la pynpaw ka jingsngew pyrshah jur pynrem jur ïa ka jingleh jong ka sorkar jylla kaba phah khot hajir ïa u Bah Saiñkupar Nongtraw, General Secretary ka HNLC ha khmat ka ïing bishar wat hapdeng ka jingïaid shakhmat jong ka jingïakren ïasuk.
Ka HNLC kala dawa ruh ïa ka Sorkar ban weng noh ïa baroh ki jingpynngat kyndon ïa baroh ki Nongialam ka HNLC bad ruh ban tyrwa ïa ka jingmap ba marmar lym kumta ka HNLC ka lah ban weng noh ïalade na ka miej jingïakren ïasuk.
“Ka HNLC ka pynrem jur ïa ka sienjam ba la shim dang shen da ka Sorkar Jylla, khamtam ïa ka jingpynbna paidbah ban khot hajir ïa u Bah Sainkupar Nongtraw, General Secretary ka HNLC sha ïing bishar wat hapdeng ba dang ïaid ka jingïakren ïasuk” ong u Bah Sainkupar Nongtraw ha ka kyrwoh.
Ula ong ba kane kam dei ka sien kaba nyngkong ha kaba ki Nongïalam ka HNLC kynthup u Chairman bad u Finance Secretary, ki la shah khot hajir hapdeng ka jingïaid ka jingïakren ïasuk.
“Kum kane ka jingleh ym tang ba ka pynartatien ïa ngi ban shaniah ïa ka Sorkar hynrei ka lah ruh ban ktah ïa ka jingpyrshang ha ka ban wanrah ïa ka jingïapynbeit ka ban neh” ula ong.
Haba pynpaw ba ka HNLC kala kut jingmut halor ka jingïakren ïasuk bad kala shim khia ha ka jingïakren bad ka Sorkar Jylla, u Bah Sainkupar ula ong “Hynrei, ngi sngewkhia bha halor ka jingleh arsap bala pyni da ka Sorkar”.
“Ka Sorkar Jylla ka la dawa ba ngan don lang ha ka jingïalang da kaba buh por ïa ka 30 tarik Nailur, katba ka MHA ha kawei ka liang, ka la pynkylla sohpdung ïa baroh ki Nongïalam ba rangbah ka HNLC ba kin wan mih hi dalade” ula ong.
` Ka HNLC ka la ban jur ba baroh ki nongïalam bad ki ehrang kin ym wan shakhmat tad haduh ba la pynurlong ïa ki jingdawa ka seng. Ka la kyntu ruh ïa ka Sorkar Jylla ban pynlong ïa ka jingïakren bad ka kynhun ba la ai jingbit da ka HNLC Central Executive Committee ba la ïalam da u Vice Chairman.
Ban pynthikna ïa ka jingseisoh ka jingïakren ïasuk, u Bah Sainkupar ula ong “Ngi dawa ban weng noh ïa baroh ki jingpynngat kyndon ïa ki Nongïalam ka HNLC bad ban tyrwa ïa ka jingmap noh ïa ki. Khlem kine ki sienjam ba donkam, ki nongïalam jong ngi kin nym lah ban ïashim bynta ha ka jingïakren ïasuk. Haba ngi la aibor ïa u Vice Chairman bad ka kynhun ban mihkhmat ïa ki sha ka jingïakren, ka jingbym shim khia jong ka Sorkar ka la sdang ban paw shai. Lada kane ka dang ïai bteng, ngim ym don lynti pat da kumwei hynrei ban weng noh na ka jingïakren ïasuk”.
Ha kawei ka liang, une u Nongïalam ka HNLC ula ong ba kumba ka paw, ym shym la don ruh kawei ka peace accord ne jingïateh kular ïasuk ha ka thaiñ Shatei Lam Mihng ka Ri ka ban treikam, laitnoh tang ka Mizo Accord.
“Wat ka Instrument of Accession, kaba ka Sorkar jong phi ka la leh jubor ïa ka Bri jong ngi 76 snem mynshwa, ym pat shym la pyntreikam kumba ka long. Nalor kata, wat ia ka Standstil Agreement ba la ïasoi hapdeng ka Sorkar India bad ka Federation of Khasi States la shu pynkheiñ. Halor kitei ki nongrim, hato phi lah ban khmih lynti ïa ngi ba ngin ïa bteng ban shaniah ïa ka sorkar?” ula ong.
“Lada ka sorkar ka pyni ïa ka mon ban pynurlong ïa ki jingdawa ki jong ngi, kaba long kumjuh bad ka rukom leh jong ka sorkar India ha ka jingphiah ïa ka Jammu bad Kashmir, kumta ngi lah ban pdiang ban ai ka jingshaniah ïa ki bor sorkar. Ha ka 5 Tarik u Nailar 2019, ka Parliament jongka ri India ka la pynbna ba la pynsangeh ïa ka jingpyntreikam ïa ka Article 370 ha Kashmir. Hadien 86 sngi, ha ka miet jongka 31 tarik u Risaw 2019 ka la phiah noh ïa ka Kashmir” ong u Bah Sainkupar.
“Lada ka sorkar ka pyni ïa katei kajuh ka nongrim ban phiah noh ïa ka jylla Meghalaya bad ban pynbna ba ka Hynniewtrep kan dei noh la ka jong ka jylla ha ka por kaba la buh kumba la leh ïa ka Kashmir, kumta ngin lah ban ai ka jingshaniah ïa ka sorkar. Ha kum katei ka khyllip mat, ngin ym donkam ïa kano kano ka jingkyrshan pisa ne kaba phi ju kdew kum ka “Rehabilitation Packages” na ka bynta ka HNLC” ong u Nongïalam ka HNLC.
“Kane ka jingïai bteng ban thombor ïa uwei pa uwei u nongïalam ka HNLC lyngba ka jingai notis ka dei ban ïoh ka jingshah kynthoh kaba khlaiñ na baroh ki liang hynrei ha kajuh ka por ngi kwah ban kren shai ba ngim tieng ïa ki aiñ kiba thombor ne ïa ka jingiap bad ngin ïai bteng ïa ka jingïaleh ka jongngi khlem da pyndem ïa ka nongrim.Ka jingtieng kam ju don ha ka rukom treikam jong ka seng bad ka jingïakhun ka jong ngi ban rah atiar ka long kaba shong nongrim ha ka histori jong ka jingïakhih ka jong ngi” ong u Bah Sainkupar.
“Ban pynthikna ba ka jingïakren ïasuk kan long kaba seisoh, ngi dawa ba ki kyndon kiba la pynngat ïa ki nongïalam ka HNLC dei ban pynkut noh bad ban map noh. Khlem ka jingshim ïa katei ka sienjam, ki nongïalam kiba hakhmat ki jong ngi kin ym ïashim bynta shuh haka jingïaid jong ka jingïakren. Watla ngi la pynkup bor ha u Vice Chairman bad ha ka kynhun ban mihkhmat ïa ngi ha ka jingiakren, ka jingpyni ïa ka jingbym don ïa ka jingsngewkhia da ka sorkar ka la nang ïai paw bha bad lada kane ka rukom, ka dang ïai bteng, ngin ym donshuh da kawei pat ka lad ban weng noh na baroh ka jingïakren” ula ong.
Shuh shuh ka jingkhang ne banned da ka Ministry of Home Affairs (MHA) ïa ka Islamic Research Foundation (IRF) hapoh ka Unlawful Activities (Prevention) Act (UAPA) 1967 ka long kaei kaei kaba donkam ban kdew. Katei ka jingkhang ka la paw ba ka long kaei kaei kumba la kam da u Zakir Naik uba la kynnoh ba ki heh ophisar jongka sorkar India ki la ïakynduh ïa ban ailad da kaba suk ban ïaid ban ïeng bad ban weng ïa baroh ki case. Ka long kaba hap ban kdew ba u Zakir Naik ula sha khang pyrshah ha kiba bun tylli ki Ri. Ha kaba ïadei bad ka jingkhang ka sorkar India ïa ka HNLC hapoh ka UAPA hapoh u pud u sam jongka MHA, kumta kane ka la pynmih ïa ka jingkylli kaba kongsan, lada ka sorkar u Modi ka lah ban pynïar ha kaba ïadei bad u Zakir Naik, balei ym shym la leh lang ïa kane kumjuh ïa ki nongïalam bad ki dkhot jongka HNLC, kiba dang ïashim bynta haka jingïakren ïasuk bad ka sorkar hi?.
“Ka HNLC ka ïengskhem ha ka nongrim ban pynurlong ban don ïa ka jingsuk kaba shi rta bad ka jingpynbeit ïa ka kam saiñ pyrthei. Ngi kyrmen skhem ba ka sorkar kan khmih bniah biang ïa ka rukom leh ka jongka bad ban trei na ka bynta ban wanrah ïa ka jingmynjur lang da baroh” la pynkut u Bah Sanikupar.