Nongstoiñ, Naiwieng 9: Ka Sorkar Meghalaya Democratic Alliance (MDA) ka la pynurlong mynta sa ïa ka jingdawa ba la slem bha jong ki paidbah ka thaiñ Rambrai, West Khasi Hills da ka jingplie paidbah u Myntri Rangbah Conrad K.Sangma ïa ka Community & Rural Development (C&D) Block ba dang shu pynkha thymmai.
Ïa kane ka C&RD Block la plie ha ka jingïadonlang u MLA ka thaiñ Bah Kimfa Sidney Marbaniang, u MDC Bah Bajop Pyngrope bad u MLA ka Nongstoiñ Bah Macmillan Byrsat.
Ka Rambrai C&RD Block ka dei kaba la pynpait na ka Nongstoiñ C&RD Block bad kan kdup haduh 109 tylli ki Shnong kiba don haduh 36,148 ngut ki nongshongshnong. Ka jingheh jong ka jaka ba hap ha kane ka Block ka long 584.628 sq km. Ka Rambrai ka dei kaba jngai kumba 20 Km eiei na Nongstoiñ kaba dei ka District Headquarter ka West Khasi Hills bad ki jaidbynriew kiba shong ha kane ka thaiñ kiba bun ki dei ki Khasi bad ki Garo.
Haba kren ha ka jingïalang, u Myntri Rangbah u la ong ba ka jingpynkha ïa kane ka Block ba thymmai kan pynthikna ïa ka jingsynshar khaddar kaba janai haduh ki shnong ki thaw. U la ong ruh ba lyngba kane ka Block, shibun ki kam pynroi kin sa wan bad ka jingshakri jong ka Sorkar ruh kan long kaba janai bha.
“Ki C&RD Block ki dei kiba shnat treikam kiba kongsan bha haba phai sha ki skhim bad ki prokram bapher bapher. Ki paidbah ka Rambrai ki la hap ban mad ïa shibun ki jingeh namar ka jinghap ïaid jngai bah ban ïoh ïa ka jingshakri jong ka Sorkar. Ka jingplie ïa kane ka Block kan pynthikna ba ka jingshakri kan don noh hajan jong u paidbah”, u la ong.
U Myntri Rangbah u la pyntip ba ka Sorkar ka la pynkhreh ïa ki kyndon treikam ba thymmai ban pynsted ïa ka jingai syrnot kiba bun jait na ki Ophis ki Block. “Ki paidbah ki lah ban aplai ïa ki syrnod bapher bapher ha ka Block hynrei ïa kine ki application yn jap ban pynïaid da ki Sub Division” ula bynrap.
Haba pynpaw ba ka thaiñ Rambrai ka dei kaba la shah iehbeiñ la slem bha, u Myntri Rangbah u la ong ba lyngba ki prokram bapher bapher, ka Sorkar kan pynthikna ba ki paidbah kin ïoh kheit ïa u soh jong ki kam pynroi ha ka Jylla. U Myntri Rangbah u pyntip ruh ba ka jingpyntrei ïa ka surok Nongstoiñ-Rambrai-Kyrshai ka la nang ïaid shaid shaid bad shen yn sa lah ban pyndep noh ïa ka. Ïa kane ka surok la shna ha ka jingmang pisa ba kot T. 231 klur.
“Namar ka jingbym bïang ka surok ha ka thaiñ, ki paidbah ki la hap ban mad ïa shibun ki jingeh. Ngin pynthikna ba kane ka surok kan dep noh kloi”, u la ong. U Myntri Rangbah u la pyntip ruh ïa ki paidbah ba ka Sorkar kan sa kyntiew kyrdan noh ïa ka Rambrai Primary Health Centre (PHC) sha ka Community Health Centre (CHC) bad ka jingbuh mawnongrim ïa kane, yn sa leh noh shen. U la pyntip ruh ba ka Sorkar ka la phah maramot ïa kiba bun tylli ki skul LP kiba don ha Rambrai bad kin don ruh katto katne ki ban sa tei thymmai.
Haba phai sha ka Block, u Myntri Rangbah u la pyntip ba ka Rambrai C&RD Block kan treikam mynta na ka Ophis ba shipor katba ka jingtei ïa ka Ophis ba thymmai ka dang ïaid.
