Jowai, Lber 19: Hadien ka jingpynbna tarik jong ka Election Commission of India na ka bynta ka General Election sha ka ïing Dorbar thawaiñ jong ka Lok Sabha, 2024 ka ban sdang naduh 19 tarik u April, 2024 na ka liang jong u District Magistrate jong ka West Jaiñtia Hills District u bah B.S. Sohliya, IAS, ula pyntreikam ïa ka kyndon 144 CrPC bad pynbna ba ka Election Model Code of Conduct kala treikam naduh ka 16 tarik u March 2024, ha West Jaiñtia Hills District baroh kawei.
Kane ka hukum kan treikam na ka bynta ki kyrtong (Contesting Candidates), ki nongbud (Agents) jong ki bad ruh ïa ki seng saiñ hima (Political Parties).
Katkum kane ka hukum la khang ban tah ïa kino kino ki poster, hoarding, ki banner ne kiwei de ki jingthoh ïalap elekshon ha ki jaka paidbah bad kumjuh ruh ha ki lynti syngkieng.
La khang ruh ban pynïeng, tah ïa kino kino ki lama, ki poster, ki hoarding, ki banner bad kiwei de ha ki jaka jong ki riewshimet khlem da ïoh bor ryngkat ka jingthoh na ki trai ïing ne trai jaka bad ruh na ka ophis jong u District Magistrate, ka West Jaiñtia Hills District.
La khang ban pynlong ïa kino kino ki jingïalang paidbah khlem da ïoh bor na ka ophis jong u District Magistrate, ka West Jaiñtia Hills District, bad kumjuh na u Waheh Shnong jong kato ka jaka ba thmu ban pynlong ïa ka jingïalang paidbah ïalap elekshon.
Yn ym shah ban pynsawa ïa ki P.A. System hapdeng ka por 10:00PM haduh 6:00AM.
Lada don ka jingpyndonkam ïa ki P.A. System ne ki Loud Speakers khlem da ïoh bor na ka ophis jong u District Magistrate, ka West Jaiñtia Hills District ïa kine ki tiar yn sa kurup noh shisyndon da ki bor ba dei peit.
Yn ym shah ban pynlong ïa kino kino ki jingïaid Raly khlem da ïoh bor shwa na ka ophis jong u District Magistrate, ka West Jaiñtia Hills District.
La khang ïa ka jingrah pisa kaba palat ïa ka Rs.50,000/- (Sanphew Hajar) tyngka da ki kyrtong lane da ki nongkyrshan jong ki.
U District Magistrate ula bthah ruh ïa baroh kiba don ïa ki tiar siat kynthup ïa ki suloi, kiba don license ba ki dei ban leit buh noh ïa ki sha ki Police Station ne ki Out Post kiba marjan jong ki ryngkat bad ki Xerox copy jong ki licence, ïa kine ki tiar yn sa pynphai pat hadien ba la kut ka elekshon. La khang ïa kino kino ki briew ban rah ïa ki tiar siat, hynrei kane ka hukum kan ym khang pat ïa ki Police bad ki Shipai ki ba donkam ba pyndep ïa ka duty jong ki.
Kane ka hukum kan treikam ha baroh ka West Jaiñtia Hills District naduh bala pynmih ïa ka bad kan bteng haduh ban da kut ka Elekshon Lok Sabha.
