Nongstoiñ, Nailar 01: Da ka jingshimkhia jong ki nongïalam ka Synjuk ki Sordar Shiphew Shnong ka thaiñ Phodumbah bad ki sengbhalang kum ka FKJGP Rambrai, ban dawa bad pynkynmaw ïa ka sorkar na ka por sha ka por ba kan shimkhia ban pynbha bad siang rong noh ïa ka surok Rambrai Maswlangsu kaba la trei naduh u snem 1993-94, mynta ka la long kaba seisoh bad shen ka sorkar kan sa ïoh ïa ka mang pisa na ka sorkar pdeng lyngba ka skhim Pradhan Mantri Gramsadak Yojana, na ka bynta ban pynbha bad siangrong ïa katei ka surok tang na Mawlangsu haduh Phodumbah ha ka jingjngai kaba san kilomitar.
Ïa ka jingpynrung ïa katei ka surok kaba la shna da ka sorkar jylla naduh laiphew snem mynshuwa, la pynthikna da u bah S.Massar Executive Engineer ka tnad PWD Nongstoiñ Division ha ki nongïalam ka Synjuk ki Sordar Shiphew Shnong ka thaiñ Phodumbah, ha ka jingleit ïakynduh jong ki ïa u ha kamra trei kam mynta ka sngi palei shi tarik Nailar.
U bah K.Nongbri president ka Synjuk haba ïakren bad u nongthoh khubor, u la ong ba hadien ka jingïalang kaba la pynlong da ka synjuk ha Phodumbah ha u bnai Jylliew ba la dep na ka liang ki nongïalam ka Synjuk ki la shimkhia bha bad ha kane ka sngi balang, ba la dep ki la leit ban ïakynduh biang ïa u Maduh Prestone Tynsong Symbud Myntri Rangbah ka jylla u ba dei peit ruh ïa ka tnad PWD.
Nangta ïa u Chief secretary ka jylla bad ïa u Chief Engineer ka PWD, ha kaba kitei ki heh sorkar ki la pynthikna ba ka sorkar jylla ka la dep pynrung ïa katei ka surok ha ka skhim PMGSY phase III.
Na ka bynta ban bteng ïa ka jingpynbha bad siang rong na Phodumbah haduh Mawthungmarwei pat, ka sorkar kan sa bishar bniah na ka jingkheiñ jingdiah kaba la shna da ka ophis u Superintendent Engineer ka PWD Western circle Nongstoiñ ha ka Detail Project Report (DPR), kaba ka kum ka jingkheiñ jingdiah jong ka ophis, ka jinglut jingsep ha kaba pynbha bad siang rong ïa katei ka surok Mawlangsu sha Mawthungmarwei kaba jngai kumba khatwei kilomitar ka long kumba arphew wei klur tam.
Utei u nongïalam ka Synjuk u la ong ruh bah na ka liang u Symbud Myntri Rangbah ka jylla bad u Chief Engineer ka PWD, ki la pynshai ruh ha ki ba ka sorkar kan pynneh beit ïa katei ka jingkheiñ bad ka mang pisa katkum ka DPR. Hynrei kan sa peit bniah pat katno yn pynlut ha kaba siang rong ïa ka san kilomitar bad katno kan mang pisa biang na ka pla tyngka jong ka sorkar jylla, na ka bynta ban pynbha bad siang rong biang sa ïa ka hynriew kilomitar na Phodumbah sha Mawthungmarwei, namar ba ka la tam haduh shi kilomitar bad ka jinglut jingsep ruh ka la kham bun. Ki la pynthikna ruh ba ka sorkar jylla kan pyndep noh ban pynbhha bad siang rong ïa ka ba dang sah baroh.
U bah Ignatius Khardewaw secretary ka synjuk u la ong ba wat la u Symbud Myntri Rangbah ka jylla u la kular ban shimkhia ïa katei ka kam ruh, na ka liang ki nongïalam ka Synjuk kin ym shongkli kti.
Hynrei kin ïai buddien na ka por sha ka por bad lada jia ba ka sorkar ka shu kular kai khlem da pyni da ki kam, ka Synjuk kan sa lum lang biang ïa ki paitbah ym tang na ki shiphew snong, hynrei na ka thaiñ baroh kawei naduh Rambrai haduh Mawdoh bad kiwei kiwei ki jaka, ban pynlong da ka jingïalang paitbah bad ban shim ïa ka rai kumno ban leh, kam pher wat lada kan poi shaduh u pud ban pynlong da ki jingïakhih ruh na ka bynta ban dawa ïa ka hok na ka bynta ki paitbah nongshong shnong.
U bah Khardewsaw u la kyntu ruh ïa ki nongïalam jong ki Village Organisation, VDP, Seng Samla shnong, Sengbhalang bad ki paitbah kiba la ai jingkyrshan ha kaba dawa ïa ka sorkar ba kan phai khmat lem sha katei ka thaiñ, ba ha kano kano ka por ba ki nongïalam ka Synjuk ki pynbna ba kin pynlong ïa ki jingïalang paitbah, kin ai ka jingkyrshan lem bad ïatreialang kaba pura khnang ban pynurlong ïa ki jingangnud jong ki paitbah ka thaiñ.
