Pynthikna ka MFA ïa ki kynhun ban ïashim bynta ha ka M’laya Women’s State League

Shillong, Jylliew 08: Ka Meghalaya Football Association hynne ka sngi ka la pynbna ïa ki 13 tylli ki kynhun ki ban ïashim bynta ha ka lympung ïalehkai phutbol ki kynthei kaba nyngkong eh, kata ka Meghalaya Women’s State League, kaban sa pynlong naduh u Nailar 2025.
Ka jingkhmih lynti ka long kaba jur na ka bynta kane ka lympung ïalehkai phutbol ki kynthei kaba nyngkong eh ha ka jylla baroh kawei ka ban pynïasoh lang ïa ki kynhun ba kynsai na ki synjuk district kiba ïasoh bad ka MFA.
Lah ban kdew ba kane ka la long ka thong jong ka jylla ban pynlong ïa ka women’s league bad ka jingangnud kan sa urlong ha kine ki ar bnai ban wan da ka jingkyrshan jong ka Sorkar Jylla Meghalaya. Ka MWSL kan plie lad ruh ïa ki klob ka jylla Meghalaya ban ïoh ïashim bynta ha ka sien kaba nyngkong ha ka Indian Women’s League second division (IWL 2).
Ka nuksa (model) na ka bynta ka MWSL ka long katkum ka jingseisoh jong ka Meghalaya State League, ka lympung ïalehkai na ka bynta ki klob shynrang, ïa kaba la kyrshan ruh da ka Sorkar Jylla. Kito ki synjuk ïalehkai jong ki District kiba ïasoh bad kiba pynlong ïa ki lympung jong ki kynthei (women’s league) ha ka thaiñ ki la lah ban buh hakhmat ïa ka kynhun lahduh bad kaba wan ba-ar na ka bynta katei ka lympung ban sa long shen.
Ki don 8 tylli ki District Association kiba la pynlong ïa kum kine ki lympung ïalehkai jong ki kynthei bad 13 tylli ki kynhun ki la pynthikna ïa ka jingïashim bynta ha kane ka lympung kaba thymmai ka ban plie lad ïa ki thei ïalehkai ba don sap jong ka jylla Meghalaya baroh kawei.
La pynlong ïa ka jingïalang kaba kyrpang jong ki nongmihkhmat jong ki klob bad ki dkhot ba rangbah jong ka MFA ha ka sngi Saitjaiñ ha Shillong ban ïakren ïa ki mat bapher bapher ha kaba ïadei bad ka MWSL.
Ki jaka ïalehkai, ka tarik sdang kaba thikna, ka jingpynïakap ïa ki kynhun bad kiwei kiwei ki jingtip ba bñiah yn sa pynpaw da ka MFA hadien hynrei ki nongïalehkai bad ki kynhun baroh kin long kiba shimkhia ban pynkhreh na ka bynta kane ka league, ka ban rai ïa ka lahduh lane ka Champions jong ka Meghalaya!
Ki kynhun ban ïashim bynta ki long kumne harum:
Ri-Bhoi District Sports Association – Na Rympei Football Academy (Lahduh), Pahamsyiem SC (Runners-up)
Shillong Sports Association – Laitkor SC (Lahduh), Pay For Right Football Academy (Runners-up)
Mawkyrwat District Sports Association – Jakrem SC (Champions), Mawten SC (Runners-up)
Pyndengumiong District Sports Association – Young Sports Social and Cultural Club (Lahduh), Bright Future SSCC (Runners-up)
East Jaintia Hills District Football Association – Diengshynrum SC (Lahduh)
Tyrsad Area Sports Association – Mawlum Tyrsad SC (Champions), Mawsawrit SC (Runners-up)
Riwar Mihngi Football Association – Lapalang SSCC (Runners-up only)
Laskein Block Sports Association – Chirupheiwei Nongkynrih FC (Lahduh)