Ka long kaei kaei kaba ym lah satia ban ngeit bad ban ïohi ba ka seng Voice of the People’s party ka VPP ba kan pynurlong shisha ïa ki jingkular por elekshon ba kan weng ïa ka jyrsieh thungkam thungjam ba khlem da ïaid da ka lynti ha KHADC.
Bad kane ka la paw shisha ba ha ka sngi ba ar jong ka taïew ba lah dep, la ïohi, ïa ki samla kiba shah beh kam, ba ki leit tur sha ophis jong ka KHADC bad ka jingdawa, ka long ba ki kwah ban thung kam biang ïa ki.
Ha ka jingshisha ki la dei ban leit shwa sha kiba thung kam ïa ki, ha shwa ba kin leit sha ka Executive Committee, namar ba kin leit kynroi ïa u bym don bynta eiei, ha kaba khot kam ïa ki, kam don jingmut satia.
U CEM ka KHADC, u Bah Shemborlang Rynjah ula kren shai, ba la beh kam ïa ki 13 ngut bad la pynkylla casual ïa ki 30 ngut kiwei pat, kiba la dep thung pynpura da ka Executive Committee barim bad ba la pynskhem ha u snem 2024, namar ba ka jingthungkam kam dei satia, kaba da don ki kam kiba lait bad lada ka long kumta, ka pyni shai ba kito kiba shah thung kam, ki la shu shah pynbeij ha ka EC barim jong ka NPP lane ka UDP kham mynshwa, hynrei kim don kam satia ban trei bad kumta ki hap ban shu ïa shang makia sharum shaneng, namar ba lehse, kim don ruh wat tang ki shuki ba kin shong hapoh kamra.
Nalor kitei ki jingshisha, ngi hap ban sngewthuh ruh, ba u paidlang ka ri Khasi, ula ïa trei bor bah ha u Prah ban jied ïa ka VPP, ba kan shim ïa ka rai kaba long beit em, na kaba ka rai ka NPP, UDP bad ma ki hi ruh, haba ki leit kanbas sha ki rynsan elekshon ha kylleng ka ri Khasi Jaiñtia, ki la lah ban pynbudnam ïa ka seng NPP, UDP, haduh ba u paidbah un da ijli shaba palat ïa kitei ki ar tylli ki seng bad mynta, haba ki don ha KHADC, ki dei ban sei madan ïa kito ki jingkynnoh jong ki, pyrshah ïa ki ar tylli ki seng.
Ka Executive Committee khlem pep, ka la pynkhreh bha ïalade, ba lada ka wan ka jingïakhun ha kashari, ba kan jubab, ba kumno kitei ki 43 ngut ki tip shwa ba lait kam, lada ka la don ne em ka jingpynbna ha ki kotkhubor Khasi ne ha kino kino ki lad pathai khubor? Nangta la ka la don ne em, ka written test bad ka personal interview bad kaei ka tnat jong ka KHADC, kaba pynïaid ïa kitei ki interview?
Katei ka jingleh jong ka EC kaba rim, ka paw shai, ba ka politik ha kine ki sngi, ka la hiar kyrdan haduh katta katta, ha kaba ha itei i ophis, iba dei ban peit kyrpang ïa ka bha ka miat u khun Khasi, hynrei kaba sngewphylla pynban ba kan kylla pynban sha ka ophis jong ka MPSC lane ka DSC bad katei ka bym bit satia ban pdiang da lei lei ruh bad lada ka long ha katei ka dur, ngin sa ïohi, ba ki nongtrei jong ka KHADC, kin hap ban ïaleh dharna khah khah, namar ba ka Council, kam don pisa satia ban siew tulop ïa ki nongtrei.
Ngi ki bym ju leit khah khah sha ophis ka KHADC, ngi ïohi, ba ha ki khyndiat snem ba la dep, ba tang ha khyrdop jong ka KHADC, ki don 4, 5 ngut kiba ap bad kin pynïeng da ka jingthoh kaba ong, “parking full” kaba thew beit ba la khang ïa ki riew paidbah ban rung sha katei ka ophis bad ynda la rung ruh, kin wan ïeng hakhmat kali ban da pyni, ïa ka jaka kaba ki sngewdei ba kin ïeng kitei ki kali kiba leit sha katei ka ophis jong ka KHADC.
Katba ka jia, ka jingpynkut ka wan hi, kumba ju ïakren ba haba ïa tur ki si kyrtong, kiba ju shah kyrshut dei ki phlang kiba mad ïa ka jingshitom ha ban da jem jai.
Kane ka jingleh ka EC VPP mynta lehse kan dang pynsyier pyntieng shuh shuh sa kiwei pat ki nongtrei ka KHADC kiba ym pat lap sa katno ngut kidei kiba la shu shah thung khlem da ïaid da ka lynti kaba dei ne da ka jingpynbna ne ki rukom treikam ba la buh ban pynlong.
Lehse bad dei ka jingdon jong ki katto katne ruh ki nongtrei ba la shu shah thung kam khlem da don ruh ki jingpyntbit ba bun ruh na ki Tnat Sorkar ban ïoh ki nongtrei kiba leh ha la ka mon.
Lah ruh ban ong ba don kum kine ki nongtrei ba sa bun ka jingshah pyntip bording bad shah pynduh umbam umdih ba khah khah ha kane ka jylla, ne ka jingpynslem ban ai ki jubab haba ki paidbah ki leit ban pan jingïarap na ki nongtrei Sorkar ne district council naba kiba kham mad jingeh ha kum kine ki jingshah thlia dei Ha ki paidbah na nongkyndong khamtam kito kiba khlem pyndep ïa ki jingpule ne ban leit skul.
