Pynthikna ka India ïa ka final pyrshah ïa ka Bangladesh ha ka SAFF U-19 Women’s C’ship

Pokhara-NEPAL, Rymphang 04: Ka India ka la pynliem noh ïa ka Bhutan da 8-0 kol ha ka jingïalehkai group stage (round-robin) ba khatduh jong ka lympung Under-19 SAFF Women’s Championship 2026 ha Pokhara Rangasala, Nepal, hynne ka sngi Balang (05 tarik Rymphang).
Da kane ka jingjop, ka India ka la pynthikna ïa ka jingïakhun phainal ha ka Under-19 SAFF Women’s Championship 2026 hadien ba ka Bangladesh ka la pynliem noh da 4-0 kol ïa ka Nepal ha ka jingïalehkai kaba bud, ban bteng ïa ka jingjop ba paka sha ka lai sien lynter.
Hadien lai tylli ki jingïalehkai ha ka wat ïakhun Round Robin, ka India ka la ïoh ban khur 6 poiñ bad pyndep ha ka kyrdan ba ar ha ka miej, bad duna 3 point hadien ka Bangladesh kaba ïalam ha khlieh duh.
Ka Nepal, ka ri kaba pdiang bad pynlong ïa kane ka Championship mynta u snem, ka la pyndep ha ka kyrdan ba lai da 3 point, katba ka Bhutan ka la pyndep sha trai duh khlem da ïoh khur wat tang shi point.
Kumta baroh ar tylli ki kynhun ba wan hakhmat (Top-2), ka India bad ka Bangladesh, kin pynkhreh ban ïa aireng ha ka phainal ban long ha kane ka sngi Saitjaiñ, 07 tarik Rymphang, 2026, ha ka por 1:45 baje nohphai sngi. ïa kane ka jingïakhun yn pyni live ha ka Sportzworkz YouTube channel.
Da kaba donkam la kumno kumno ban ïakhaid ne jop ban dang neh ha ka jingïakhun na ka bynta ka nam lahduh, ka India ka la sdang ha ka rukom kaba khlaiñ, da kaba ñion khlem sangeh ïa ka Bhutan naduh kaba sdang.
Ka Alisha Lyngdoh, na Meghalaya kaba la mih madan kum ka nongbujli ha ka jingshah rem da 2-0 ha ka Bangladesh ha ka jingïalehkai ba ladep, ka la plie ïa ka jingkhang na ka bynta ka kynhun da kaba pynkhihjar ha ka minit kaba 6 hadien ba ka la shah kynthup ha ka kynhun ba sdang (Starting XI).
Ka Abhista Basnett (10’) ka la pynjlan ar shah ïa ka kol lamkhmat hadien saw minit, bad dei naduh kane ka por ba ka jingtuid jong ki kol ka la sdang na ka bynta ka kynhun India.
Ka Pearl Fernandes (16’, 39’ & 41’) ka la pyndep ïa ka hat-trick ha ka kylla step, katba kiwei ki kol la thep da ka Divyani Linda (17’) bad ka Pritika Barman (25’ & 90’).
Ka jingïakhun ka la paw ba ka la kut naduh ka kylla step, ha kaba ka India ka la lamkhmat haduh 7-0 kol. Ka Barman ka la thep ïa ka kol kaba ar bad kaba phra jong ka India ha ka shi minit na ka jingïalehkai ban pynkut ïa ka jingjop kaba donbor.
Kane ka jingjop ka long kaba ar na ka bynta ka coach ba thymmai ka Pamela Conti, ha kaba ka India ka la khie im biang hadien ba ka la shah rem noh da 0-2 ha ka Bangladesh ha ka jingïalehkai ba la dep.
Ka India ka la sei madan da ka kynhun ïalehkai ba hapoh 17 snem (U-17) ha kane ka lympung kum shi bynta jong ka jingpynkhreh jong ka ri ïa ka AFC U-17 Women’s Asian Cup.
Ka kynhun U17 jong ka India kaba ïakhun pyrshah ïa ka Bhutan: Munni (GK), Alena Devi Sarangthem, Elizabed Lakra (Shveta Rani 29’), Divyani Linda (Binita Horo 46’), Thandamoni Baskey, Julan Nongmaithem (C) (Redima Devi Chingkhamayum 46’), Pearl Fernandes (Valaina Fernandes 46’), Pritika Barman, Abhista Basnett (Jyoshini Chanu Huidrom 46’), Alva Devi Senjam, Alisha Lyngdoh.