Nongstoiñ, Jylliew 18: Ki Nongshong shnong ka shnong Nongumkap kaba don ha West Khasi Hills, ki la ap ïa ka jingisynei jong ka Sorkar jylla ban kner lem ïa ki jingïarap, namar ka jingim ba sohsat na ka jingwan jong ka lyiur manla u snem.
Ka Nongumkap ka dei ka shnong kaba khatduh ne ha tduh eh jong ka West Khasi Hills District, kaba la don naduh u snem 1952 bad kaba don markhap ka East Garo Hills District, ïa kaba la pynïakhlad tang da ka wah ba la tip kum ka Wah Ryndi.
Ka shnong Nongumkap ka shaniah tylli ïa ki Shnong ba marjan ka East Garo Hills ban ïoh ïa baroh ki jingdonkam naduh ki marbam mardih, ka siew ka tda, ka dawai dashin haba pang ba shitom bad ter ter.
Hynrei, ban leit sha kine ki shnong ka East Garo Hills, ki paidbah ki hap ban jam ïa ka Wah Ryndi, kaba la pynbor ïa ka Shnong ban shna dalade ïa ka jingkieng dieng ba shipor tang ban ïoh jam ïa ka Wah. Kane ka jingkieng ka dei kaba neh tang ha ki ar lane lai aiom bad tang shu poi ka lyiur, ka lad pynïasoh ka la dkut noh namar ka jingshah rong umsaw.
Lah ban kdew hangne, kane ka Shnong haduh mynta kam pat ïoh satia ïa ka surok lane da kiwei pat ki lad pynïasoh, hynrei da ka jingkitkhia hi jong ka Shnong bad ki Nongïalam Shnong, ka lad pynïasoh ba don ha kane ka shnong ka dei tang ka surok khyndew ba la shu pyntrei hi na ka skhim MGNREGS.
Dang ha ka 30 tarik Lber 2024, ki paidbah ka Shnong Nongumkap ha ka jingïalam u Sordar Bah Jeremaïa Dkhar bad u General Secretary Bah Samson K Kani, ki la ïamih paidbah ban shna ïa ka jingkieng halor ka Wah Ryndi, ban pynïasoh ïa ka West Khasi Hills bad East Garo Hills, khnang ban pynsuk ïa ka leit iew leit hat bad ka ïaid ka ieng.
Hynrei, ka jingther u slap jong kane ka lyiur ba mynta, ha ka 16 tarik Jylliew, kane ka jingkieng ka la shah rong noh ha ka umsaw bad pyndkut lut ïa ki lad pynïasoh sha kane ka Shnong. Ka surok MGNREGS ruh kam long shuh ban ïaid kali, namar ka jingktieh palat haduh ba bun ki kali kiba sahkut bad ngam ha ka ktieh.
Namar kane ka jinglong jingman, ki nongïalam Shnong ki la buh ka jingkyrpad ïa u MLA bad MDC ka thaiñ bad kumjuh ruh ïa ki bor Sorkar, ba kin phai khmat lem sha ka shnong da kaba theh leh ïa ki lad jingïarap, khamtam eh ban pynshna ïa ka jingkieng halor ka Wah Ryndi bad ban pynpoi ïa ka surok ba bha sha kane ka shnong.
