Pynstet ban pyntreikam noh ïa ka aiñ, dawa ka HFU na u CEM
Dang bteng ka jingshah ot kilo ki mar rep
Shillong, Nailar 08 : Ka kynhun ki nongrep ka jylla ha ka lama jong ka Hill Farmers’ Union (HFU) ki la leit ban kynduh ïa u Chief Executive Member ka KHADC, Bah Pynïaid Sing Syiem ban pyntip ba ka jingot kilo ïa ki mar rep ka dang ïai bteng haduh mynta mynne ha ki Ïew kynthup lang ha Ïewduh ruh.
Ka kynhun ka la pynkynmaw ruh ba ka aiñ ‘Management and Control of Markets Act, Meghalaya’ kam pat treikam pura satia naduh ba ka la long ka aiñ kaban peit na ka bynta ka jingtehlakam ïa ki ïew ki hat.
“Kane ka aiñ kaba la mynjur da ka KHADC ha u Lber 2021 bad ïoh pat ïa ka jingmynjur na u Lat ha u Naitung 2023, ka long ban kyntiew bad plie lad ïa ka jingpynïaid ïew ïa ki mar rep, ki jingri da ka rukom treikam kaba khuid bad kaba shai,” ong ka HFU ha ka kyrwoh sha u CEM.
Da kaba pynkynmaw ïa ka jingkren jong ka Executive Member ka tnad Market, Kong Grace Kharpuri ba katei ka aiñ kan treikam ha baroh ki ïew kiba hap ha u pud u sam jong ka Council, ka HFU ka ong ruh ba ki khmih lynti ba ka Executive Committee kan wanrah noh da ka Minimum Support Price kaban ïarap ïa ki nongrep.
Kumta, na ka liang u President ka HFU, Bah Commander Shangpliang haba kren bad ki lad pathai khubor u la ïathuh ba ha ka jingïakren bad u CEM la pyntip ïa ki ba shen ka Council kan shim ïa ka rai kaba ïadei bad katei ka jingdawa jong ki.
“Na ka liang u CEM u la kular ba ha une u bnai kin shna noh ïa ki kyndon (rules) kiba ïadei bad katei ka aiñ bad la kular ruh ba hadien ba la dep ïa kitei ki rules yn sa lah ban pyntreikam pura noh ïa katei ka aiñ nongrep,” ong u Bah Commander.
Ha kajuh ka por u ong ruh ba ki khmih lynti ba kane ka aiñ kan treikam noh naduh u bnai ban wan na bynta ka jingmyntoi ka ïoh ka kot jong ki nongrep kiba ju leit ban die ïa ki jingmih na ki jaka rep sha ki ïew ki hat kiba don kylleng ki bynta jong ka rilum Khasi-Jaiñtia.
U President u kyntu ruh ïa ka KHADC ba hadien ba la dep ïa kitei ki rules, ba ki dei ban buh ruh ïa ki briew kiban peit ïa ka jingpyntreikam pura ïa kitei ki kyndon khnang ba lada ki nongrep ki kynduh ïa kino kino ki jingeh kin lah pat ban leit ujor ha ki.
Na ka liang ka seng nongrep ka pynpaw ruh ba hadien ba ka KHADC ka la lah ban pyntreikam pura ïa kane ka aiñ nongrep khlem artatien kiwei pat ki ïew kiba don ha pud u sam jong ka Jaintia Hills Autonomous District Council (JHADC) bad kumjuh ha Garo Hills Autonomous District Council (GHADC) kin sa bud lang.