Mawkyrwat, Lber, 21: Ka Meghalaya State Price Monitoring bad Resource Unit(MSPMRU) mynta ka sngi ka 21 tarik u Lber, 2024 ka la pynlong ïa ka seminar ha kaba ïa dei bad ka jingpynïaid beit ïaid ryntih ïa ka dor ka mur jong ki dawai dashin da ka National Pharmaceutical bad Pricing Authority (NPPA) bad Introduction to Pharma Sahi Daam na ka bynta ki trai dukan jong ki dukan die lang bad dukan die khutia mutia kiba don ha South West Khasi Hills District, ha ka jingïalang kaba la long ha Mawkyrwat Community Hall.
U Block Development Officer ka Mawkyrwat C&RD Block Bah I. Lawriniang, u la long kum u kongsan ryngkat ka jingïadonlang ki kynthup u bah W. L. Snaitang, Secretary Shnong, bah B.C. Kharsyntiew, Senior Drugs Inspector Meghalaya, Shillong, ka kong Y. Biam, Drugs Inspector, West Khasi Hills District, Nongstoin, bad u bah E. Tariang, District Social Welfare Officer, South west Khasi Hills District bad kiwei pat.
Haba kren ha ka jingïalang u Bah I. Lawriniang u la pyntip ba la pynmih ïa ka “Pharma Sahi Daam” mobile application app khnang ba ki nongthied kin dup tip ïa ka dor ka mur jong ki dawai dashin na ka jaka ba ki thied. U la ïathuh ba ka sorkar ka la ïaleh katba lah ban teh lakam khnang ba kan don ka jingïaid beit ïaid ryntih jong ka dor ka mur ha kaba ïa dei bad ka jingdie ïa ki dawai dashin ha ïew ha hat. Ha kajuh ka por u la pynshlur bad wer ïa ki doktor ban kyntiew ïa ki dawai kiba treikam kumjuh hynrei kiba ïapher tang ha ka dor. Shuh shuh u la ban jur ba lada ki lap ba don u laiñ saw ha u strp dawai kim dei ban dih ne pyndonkam khlem da ïoh jingbit na ki doktor.
Haba kren halor ka phang kaba ïa dei bad ka Meghalaya State Price Monitoring bad Resource Unit (MSPMRU), u Senior Drugs Inspector, Meghalaya, Shillong, u bah B.C. Kharsyntiew, u la ong ba la thaw bad register ïa ka MSPMRU ha ka 1 tarik u bnai Kyllalyngkot, 2023 da ka jingthmu ban ïarap ïa ki nongdie bad ïa ki nongthied bad ka kamram ba kongsan jongki ka long ban peit ha kaba ïa dei bad ka dor ka mur jong ki dawai, ban pynthikna ïa ka jingdon jongki bad ban pynioh ha ka dor kaba bit bad ban pynsngewthuh ne ai jingshai ïa ki nongthied.
Ka kong B. Nongrum, Field Investigator ka la ai ïa ka presentation halor ka jingbuh beit buh ryntih ïa ka dor ka mur jong ki dawai bad ka jingbatai lyngkot halor ka Pricing, ka Introduction to Pharma Sahi Daam, Drug Regulatory System ha India, ka National Pharmaceutical bad Pricing Authority, Drug Price Control Order (DCPO), 2013, Consumer Awareness, Publicity bad Price Monitoring (CAPPM), Pharma Sahi Daam nalor kiwei.
