Pynsngewthuh ka DLSA ïa ki khynnah skul halor ka POSCO Act bad ban kiar na ka shongkha khynnah

By Mawphor News Desk On Feb 18, 2023

Mawkyrwat, Rymphang, 17: Ka ophis jong ka District Legal Services Authority (DLSA) jong ka South West Khasi Hills District mynta ka sngi ka la ïoh ban pynlong ïa ka prokram ai jinghikai ïa ki khynnah skul halor ki lad jingïaid ïa ki khynnah kaba dei hapoh jong ka “NALSA (Child Friendly Legal Services to Children and Protection) Scheme 2015, POCSO Act 2012 bad ka Prohibition of Child Marriage Act 2006”.
Ka jingthmu jong kane ka prokram ka long ban pynsngewthuh ha ki khynnah ba ki dei ban tip lypa ïa kita ki aiñ ha ka shongkha shongman kiba ka sorkar India ka la dep ban buh lypa, bad na ka liang ka Legal Service Authority ka peit ruh ba kin nym don kino kino ki khynnah kiba shah ñion ïa ki hok ki jong ki kum kaba phah trei ïa ki khynnah ha ki jaka bym dei ban phah trei bad kiwei de ki aiñ.
Ka kong D. Sohtun, MJS, Chief Judicial Magistrate – cum – Secretary, District Legal Services Authority (DLSA), South West Khasi Hills District ha ka jingkren jong ka ka la ai bad pynsngewthuh bad ai jinghikai ïa ki khynnah kumno ban tip ïa ki aiñ halor ka jingshah thombor ïa ki khyllung, khynnah ban ïada ïa ka hok jong ki khamtam eh ïa kito kiba dang hap hapoh ka karta kaba 18 snem ha kaba ïa dei bad ka shongkha shongman khynnah, bad ruh ban ym shah ban pyntrei shitom ïa ki khynnah da kaba shah pyndonkam bakla ha ki briew kiba la heh ïa kiba dang rit ka karta, bad kumjuh ruh na ka bynta ki khynnah kiba la pep skul noh shiteng por. Namar ba bun ki khynnah kiba dang ha ka 14 snem ka karta ki la ngop noh ha ka shongkha shongman bad shah pyntrei jubor ha ka por ba dang lung ka karta kaba ki khynnah ki dang donkam shibun ïa ka por ban heh ban san, kumta ka long kaba donkam ban pynsngewthuh ha ki ïa ki jingdonkam bad ki jingïada lyngba ki aiñ kiba paka.
Ha kajuh ka por ka da kyntu ruh ïa ki khynnah ba ki dei ban kiar na ka jingïalang samla bym pat biang ka karta khnang ban lait na kane ka jingïashongkha dier por, kumjuh ruh lada don mano mano ki briew kiba leh donbor ban ïa ki kim dei ban sheptieng ne sngewtieng ki dei ban mih shakhmat ban ïathuh ha ïing ha sem bad kumjuh ruh ha ki bor jong ka aiñ khnang ban ïoh ka jingïarap ïa ki, namar ba ki don ki lad ki lynti ban ïarap ïa ki khlem kano kano ka jinglut ha ka pisa tyngka namar ba ka aiñ hapoh jong ka Ri India lyngba ka Children Protection Act ki lah ban ai jingtip ha ki khnang ba kin lah ban ïarap ha kino kino ki bynta katkum ki jingujor ne jingpyntip jong ki.
Ka la pynkynmaw ruh ba ha shwa ban ban ïalang samla lada kynthei ne shynrang ki dei ban long kiba la don ïa ka epic thep vote kaba mut 18 snem shaneng bad ha shwa ban ïalang samla da pyntip shwa ha ki kmie ki kpa. “Ki shynrang bad ki khynthei ki don la ka jong ka met ba kyrpang, kumta ki khynnah kim dei ban ïalehkai da kaba ktah ïa ka met ki bym dei namar ka long kaba bym dei, kiar da kaba ïalehkai lang bad ki kynthei namar ka long kaba sniew bad kin ngat ha kata ka aiñ POCSO Act 2012 lada ki bakla na kata”, ong ka ong Sohtun.
Ka kong N. Hahshah, Panel Lawyer, District Legal Services Authority (DLSA), South West Khasi Hills District pat ha ka jingkren jong ka ka la ïoh ban pynshai halor ki katto katne ki aiñ bad ki kyndon ban pynshitom ïa ki briew kiba leh donbor ne leh be-aiñ ïa ki khynnah da kaba kyntu ba kane ka POCSO Act kam thew eh tang ïa ki kynthei hynrei ïa ki shynrang ruh ba ïa ki kynthei kiba dang hapoh ka 18 snem bad ïa ki shynrang kiba dang hapoh ka 21 snem ka aiñ ka pynshitom kumjuh ïa ki. “Ka jingshongkha khynnah ka ktah shibun ïa ka met ka phat, ka koid ka khiah bad ruh ym tang ïa ki hynrei ha ka imlang sah lang”, ka la ong. Kumta kum ki khynnah skul kim dei ban ïalehkai ha kane ka bynta namar wei la bakla ka aiñ ka la ap lypa ban shah pynshitom, namarkata, long borabor ki khynnah ki stad.
Ha kawei pat ka bynta ka la ong ba kum ki khynnah bad ki kmie ki kpa la don ki jingjia shah leh donbor ïa ki khynnah ki dei ban ai jingtip wut wut sha ki ophis ba dei peit ban ïoh ki jingïarap, kum ha ophis jong ka Social Welfare bad ruh ha Ïing Kashari ba lada don kino kino ki jingjia khnang ba ki bor jong ka aiñ kin pynshitom ïa ki katkum ka jingmudui ïa kita ki nongleh bymman.
Ïa katei ka prokram la ïoh ban pynlong Wahsiej Secondary School, Wahsiej, South West Khasi Hills District bad ha kane ka sngi ïa ka jingkren khublei la ïoh na u Babu T. Lyngdoh, Headmaster jong ka Wahsiej Secondary School, Wahsiej.