Nongstoiñ, Rymphang, 17: Mynta ka sngi ha ka por kumba 3:30 nohphai sngi, ka thylliej ding kaba klang ka la bam duh ïa ka ïing jong ka kong Aisidora Nongphud na ka shnong Mawsiangbah.
U bah P.Nongsiej uwei na ki riew rangbah jong katei ka shnong haba pyntip ha u nongthoh khubor, u la ong ba hadien ba ka thyliej ding ka la klang, ki para marjan ki la ïa mih bad pyrshang ban pynlip ïa ka ding. Hynrei kim shym lah ban leh ei ei namar ba ka la klang palat. U la ïathuh ruh ba ki rangbah shnong ki la pyntip mar mar sha ki pulit bad ki pulit ruih khlem da pynslem ki la wan sha katei ka jaka ban sorjamin halor katei ka jingjia. U la ïathuh ruh ba ha katei ka por ba ka ding ka la klang, ki don ar ngut ki khun kiba dang rit hynrei kaba donbok ka long ba ki la phet noh na katei ka jaka bad ki la lait na ka jingmynsaw.
