Mawkyrwat, ‘Naiwieng 08: Da ka jingthmu ban don ka jingïajan bad ban kyntiew ïa ka rep ka riang bad ban iarap ruh iaki jingeh jong ki nongrep hapoh thaiñ bad ka jylla ka Farmers Front (FF) Meghalaya State Unit kaba hap hapoh ka National People’s Party (NPP) ha ka sngi Thohdieng ka la lum jingïalang paidbah ha Mawkyrwat, South West Khasi Hills District.
Ka Farmers Front ka don jingthmu ruh ban ban thaw ïa ka shnat treikam jong ka bad ha kane ka sngi ka sngi ka NPP Mawkyrwat Farmers Front ka la lum lang ïa ki paid nongrep na ka thaiñ Mawkywat na ka bynta ban twad jingtip bad ban ïoh sngew ruh ïa ki jingeh jong ki nongrep ha ka thaiñ.
Ha kane ka jingïalang la don lang u Chairman jong ka Farmers Front u Bah Himayala M. Shangpliang, u General Secretary u Bah Kansing Lyngshiang bad u MDC jong ka Mawkyrwat Constituency u Bah Carnes Sohshang
Ka la long ka jingmyntoi kaba khraw ïa ki nongrep namar lyngba ka jingïoh ïashim bynta lang jong ki baroh ban pynsngew ha la ki jong ki jingshem jingeh ha kaba ïadei bad ka kam rep kam riang bad kumjuh ha ka kam ri jingri.
Haba kren ha ka jingïalang, u Bah Himalaya, u Bah Kansing bad u Bah Carnes ki la ai mynsiem bad ai jingmut ruh ïa ki nongrep ïa kaei kaba ma ki kin leh kumba la pynsngew da ki nongrep ha ka jingïalang.
“Ngin sa leit ban pynsngew sha ka sorkar jylla lyngba ka Myntri ba dei peit ïa ka rep ka riang bad ka ri jingri ha ryngkat ki ophisar jong ka distrik ban ïa phylliew jingmut kumno ban lah ban weng ïa ki jingeh jong ki nongrep lyngba da ki lad jingïarap kiba wan na ka sorkar”, ai jingkular ki lai ngut ki nongkren.
Ki nongrep ruh ki la ïoh ka lad ban pynsngew ïa shibun ki jingeh da kaba kyntu ïa ki nongïalam jong ka Farmers Front ban sngewlem ïa ki mat ba hakhmat eh kaba ïadei bad ka bynta ban pynïaid ïew ïa u Synsar, u Biskot, bad kiwei de ki mar rep kiba mih napoh ka South West Khasi Hills District.
Ki nongrep ki la pynsngew ruh halor ka jingdonkam ha ki thaiñ Riwar ba ki da kwah eh ban don noh da ki Ropeway ne ki kor ba shu ïaid na suiñ khnang ban suk ha ka kit ka bah namar bun ki jaka rep ha ki thaiñ ri war ki hap ban ïaid kjat kaba da ki 2 bad 3 kynta.
“Lada ngi don ïa ka Ropeway kan pynsuk shibun ha ka kit ka bah khamtam ïa ki mar rep kiba khamkhia”, ong ki nongrep.
Ha ka jingïalang la ïakren ruh ha kaba ïa dei bad ka kam ri jingri kum ka kam ri sniang, ri syiar bad dohkha, namar ba ki briew kiba don happoh ka South West Khasi Hills District ki don palat 80% ki dei ki tang ki nongrep suda.
