Pynskhem u IG BSF hakmat u CM ïa ka jingkitkhlieh ban pynneh ïa ka shongsuk ha khappud

Shillong, ïaïong, 05: U Inspector General ka tnat shipai BSF Meghalaya Frontier u O.P. Upadhyay u la pynthikna ba ka tnat shipai BSF kan pynskhem ïa ka jingkitkhlieh na ka bynta ka jingïada ri bad pynthikna ïa ka jingïatreilang kaba pura bad ka Sorkar Jylla ha kaba pynneh ïa ka shongsuk shongsaiñ ha u pud u sam jong ka ri India.
Une u heh ka tnat shipai BSF ula ai ïa ka jingkular ha ka jingïalang ba la pynïaid da u Myntri Rangbah ka Jylla u Conrad Sangma ha ka sngi Thohdieng.
Da kaba pynpaw ïa ka jingsngewnguh ïa ka jingkyrshan ba radbah na ki bor synshar ka Sorkar Pylla bad ki Pulit, u IG BSF u la pyntip ha u Myntri Rangbah shaphang ki mat kiba ïadei bad ka jingïada ïa ki khappud, ka jingïatreilang ha ka jingïaid lynti shabar pud bad ka jingïatreilang hapdeng ki BSF bad ki tnad treikam jong ka Sorkar Jylla.
Ha kane ka jingïakren, u IG BSF u la pyntip sha u Myntri Rangbah ka Jylla halor ka jinglong jingman jong ka jingshngaiñ ha shilynter ka khappud Indo-Bangladesh ha Meghalaya bad ka jingpyrshang jong ki shipai BSF ban pyrkhing bad ban tehlakam ïa ki kam runar ruser sha shiliang pud, ka jingkhaii tuh bad ka jingrung beaiñ jong ki mynder na ka ri Bangladesh.
U Myntri Rangbah u la ban jur ïa ka jingdonkam ban bteng ïa ka jingïatreilang, ka jingïasam jingtip bad ka jingïatreilang bad ki paidbah ban pynneh ïa ka jingsuk bad jingshngaiñ ha ki jaka khappud.
Nalor kata, ha ka jingïalang la ïakren ruh shaphang ki jingeh ha ka roi ka par ha ki shnong khappud bad ban wad ïa ki lad ki lynti ban pynkhlaiñ ïa ka jingïatreilang hapdeng ki BSF, ki tnad Sorkar bad ki nongshong shnong.