Shillong, ïaïong, 05: Ka South West Garo Hills District ka la kynjoh sha ka thong kaba kot 74.77% ha ka jingpas bha jong ki khynnah skul kiba ïakhun ïa ka eksamin Secondary School Leaving Certificate (SSLC) ha kaba ïa ka result la pynbna da ka Meghalaya Board of School Education (MBoSE) ha ka Saitjaiñ.
Kane ka jingpas bha jong ki khynnah ka la kiew bha haba ïanujor bad ki snem kiba ladep kaba long tang 28% ha u snem 2024 bad 26% ha u snem 2023.
Katkum kane ka result la shem ba ki skul ha South West Garo Hills kiba la kynjoh ïa ka jingpas bha ki khynnah shispah na ka shispah ki long ka Nogorpara Deficit Secondary School, ka Good Shepherd Secondary School, Chapahati, ka Boldamgre Deficit Secondary School, ka Jewel Secondary School, Mahendraganj, ka Kasturba Gandhi Vidyalaya Balika Girl’s Residential School Betasing bad Zikzak, ka Mothers’ Union Secondary School, Ampati, ka Bidan Bisik Secondary School, Rangsakona, ka St. Francis De Sales Secondary School, Mellim, ka Katuli Deficit Secondary School, Vidyamoni Secondary School, Garobadha bad ka Rangsakona Deficit Higher Secondary School.
Kaba kham pynsngewtynnat shuh shuh ka long ha kane ka jingpynbna ïa ka result, na kane ka District, u Mahir Islam uba pule ha Mahendraganj Higher Secondary School u la ïoh rung ha ka kyrdan 5th position da kaba ïoh 570 marks, u Tengkim G. Sangma uba pule ha St. Claret Secondary School, Ampati uba la ïoh 100 mark ha ka sobjek Health and Physical Education, ka Amamy A. Sangma bad ka Arbina Ch. Marak kiba pule ha St. Dominic Savio School, Garobadha ki la ïoh distinction ruh ha baroh hynriew tylli ki sobjek.
