Mairang, Nailur, 24: Ka dorbar pyllun jong ka Seng Kur Warjri, ka ba kynthup ïa kumba khyndai tylli ki kyntoit shnong hapoh ka shnat Pyndenumïong ka la long mynta ka sngi ban khmih ïa ki jingdawa jong ki parakur parajait jong kita ki shnong ha ka liang ka bha ka miat jong ka imlang sahlang, khamtam ha ka ïap ka im bad ka pang ka jhia. Ka shnat Pyndenumïong ka dei kawei na ki katto katne ki shnat na ka thaiñ Mairang ka ba la pynïasoh noh ha ka thapniang jong ka seng kmie hadien ba la pynbeit ryntih ba yn ïa kit ïa bah ïa ka lyngkor jong ka Seng Kur Warjri na la ki thaiñ lajong.
Ka thaiñ Mairang ka dei kawei na ki jylli ha ka Ri Khasi ka ba kham bun ki parakur parajait Warjri, ha ka ba la dawa ban thaw shuh shuh ki shnat ki ban kit ban bah ïa la ki parakur ha kylleng ka thaiñ.
Ha kane ka sngi la jied bad pynskhem ïa ki nongkitkam bathymmai jong ka shnat Pyndenumïong ha kaba la pynskhem artat da ki nongïalam na ka seng kmie ba kynthup ïa ki khliehduh, u Bah George Warjri, President, Sunshine Warjri, General Secretary bad katto katne ki ba la ïa synran lang. Ki nongkitkam bathymmai jong ka shnat Pyndenumïong ka Seng Kur Warjri ki long u Bah Watbor, President, Bah Bekshar Warjri bad Bah John Genesis Warjri kum ki Vice President, Bah Alexander R Warjri, General Secretary, Giman Warjri, Treasurer ryngkat bad kumba arphew ngut kiwei pat ki dkhot nongkitkam ki ba kynthup ruh ïa ki nongmihkhmat na baroh khyndai tylli ki kyntoit shnong Dong Bir, Dong Gate, Sangshong, Mawsawa, Langstiehrim, Umwiehsup, Block, Lummaralong bad Lumiew. Ha kane ka dorbar la ai kaiphot ruh ïa ki kam jong ka shnat na ki nongkitkam ki ba hashwa bad ka ba kham kongsan ka long ka kaiphot halor ka khanasamari ka ba la dep lum kumba 668 ki longiing Kur Warjri ha ka shnat Pyndenumïong.
