Shillong, K’lyngkot, 19: Ki samla bad ki rangbah jong ka Balang Presbyterian Laitlyngkot lyngba ka kynhun kaba ki la thaw bad tip kum ka KNER ha ka step sngi Palei ki la aiti ïa ka ïing kaba ki la pynshna lyngba u synñiang jong ki hi lem ka jingïatynrong lang na bun ki paralok, ki nongshong bad kiwei pat.
Kane ka iing kaba la pynshna monsngewbha ka dei na ka bynta ka longïing jong u Bah Kenion Shabong ha ka kyntoit Wahshnong, Dong Iewshyllong jong ka Elaka Laitlyngkot lem bad ki khun ki kti jong u kiba im hapdeng ka jingkyrduh bad jingeh na ka jingbym biang ka ïoh ka kot.
Kawei pat ka daw ba ka KNER ka la kner ïa ki kti sha kane ka longïing ka dei namar ka jingrit bad jingisangsot ka iing kaba mynshwa kaba don ha ka jaka ba long them bad mad jingshah lynshop ha ka um ha ki por slap.
Ka kynhun ka la shim ïa ka rai ban pynshna ïa katei ka iing ha ka 10 tarik, Nailur, 2022 bad sdang pat ban shna pat ha u bnai uba bud ha ka jingïalam u Bah Pynbitlang Nongkhlaw bad tang mynta u bnai la lah ban pyndep ïa kane ka iing bad aiti ïa ka sha kane ka longïing.
Nalor u Pro-Pastor ka Balang Presbyterian u B Nongkhlaw, u Rangbah Shnong ka Dong Iewshyllong, Bah Ryngkat Lyndem, ki nongïalam Balang ba kynthup ïa u Bah R Khongjee, nangta ki nongkitkam ba kynhun KNER ba kynthup ïa u Bah Ambor Majaw, Chairman, Bah Perry D Lyndem, Secretary bad kiwei pat ki la sakhi lang ïa kane ka jingïalang aiti ïa katei ka ïing ha katei ka step.
