Pynshlur ki MLA ka East Jaiñtia Hills ïa ki paidbah ban phaikhmat sha ka ri Ngap bad ka kam rep

Khliehriat, Nailar, 18: Ka tnat jong ka rep ka riang, ka ophis jong u District Horticulture East Jaiñtia Hills District, mynta ka sngi ka la pynlong ïa ka ïew pyni nam ïa ki mar rep, kyntup ruh ki dieng soh, ki syntiew, ïa kane ka prokram la pynlong ha Khliehriat West.
Na ka liang u kongsan, u bah Kyrmen Shylla bad ka Symbud kongsan, ka kong Santa Mary Shylla, ki la pynshlur ïa ki nongrep ba kin pynheh shuh shuh ïa kane ka kam rep bad kumjuh ruh ka kam ri ngap kaba ju tip kum ka Apiculture Mission.
Haba kren kum u kongsan, u myntri ka sorkar jylla, u bah Kyrmen Shylla, u la ai jingmut shuh shuh ïa ki nongrep ba kin thung ruh ïa ki dieng kseh ha ki jaka rep jong ki namar ka jingdon ki dieng ka pynpyngngad ïa ka jaka bad ong ruh ba ka jingmih na ka rep ka riang ka long kaba heh ban ïa kito kiba die dewïong, namar lada u dewiong u shongdor T6500 shi ton, ka mut ba u dwiong u shongdor tang T6 tyngka tam shi kilo, katba ki jhur pat ki shongdor da ki phew bad ki spah tyngka shi kilo, kumta lada ki nongrep ki shim khia kin long kiba kham riewspah ban ïa kito kiba trei dewïong, ha kajuh ka por u la pynpaw ruh ba u don ka jingngeit ba ki heh sorkar ki shim khia bha ïa ka kam ban kyntiew ïa ki nongrep.
Ha kajuh ka por, u bah Kyrmen u la pynshlur ruh ïa ki paidbah ba kin shim ïa ka kam ri ngap ruh kum kawei na ki lad kamai ban kyntiew ïa ka ïoh ka kot.
Ka kong Santa Mary Shylla, ka la ong ba ka long kaba sngewtynnad ban iohi ba naduh u snemm 2014 naduh ba khang dewïong, ki paidbah ki la sdang ban phai khmat sha ka kam rep bad ong ba ka long shisha kaba donkam ban phai sha ka kam rep ruh, ym ban shu phai khmat than tang sha ka kam dewïong bad ong ruh ba katno kan long kaba sngewtynnad lada lah ban pynmih hi ïa ki mar rep “Ka jingkiew dor ki mar rep ka dei namar ba duna ki mar rep kiba pynmih napoh ki shong ki thaw, na kata ka daw hap ban wanrah ïa ki mar rep wat na shabar ruh” ka la bynrap.
Ka la kyntu ruh ïa ki heh sorkar ba kin shim khia ban kyntiew ïa ka kam rep bad kumjuh ruh ki paidbah nongrep ban kyntiew lem iwei ia iwei bad ruh ban shim ïa ki lad ai jingiarap na ki tnat sorkar, kum ki skim rep bad kiwei kiwei ki jingiarap.
Kitei ki ar ngut ki nongmihkhmat, kiba napoh ka district, ki la ai ka jingiaroh ïa ka tnat Horticulture kaba la lah banpynlong ïa kane ka prokram kaba donkam bad kaba long ruh kum ka jingai mynsiem bad kaba pyn shlur ïa ki paidbah nongrep bad ïa baroh ki paidbah jong ka district.
Ha kane ka ïew pyni nam ïa ki mar rep la ïa wan ruh ban ïa shim bynta lang ki nong ri ngap kiba na East Jaiñtia Hills District, kiba kynthup u bah R.Moling Bamon, uba na Lum-shnong, u bah Sunshine Ryngkhlem, uba na shnong Wapungskur, u bah Karwel Biam, uba na shnong Musiang Lamare, u bah Amnesty Salahe, na Samasi, i kong Pynkhreh Manar, na Samasi, u bah Fullness Manar, na Kseh bad kiwei kiwei, kine ki la wan ban pyni nam ïa ki um ngap bad ki rew ngap bad ki la shim khia ruh ïa kane ka kam ri ngap kum kawei na ki lad kamai.
Kiba la ai jingkren ki kynthup ruh ka Director jong ka tnat Horticulture, ka kong D.Sohtun, u District Horticulture Officer East Jaintia Hills District, u bah D.B.Dkhar, u Executive Engineer jong ka tnat Water Resourses, u bah Kordor Lamare, u Assiatnat Director jong ka tant Agriculture, u bah M.Slong, u Senior Scientist Head East Jaiñtia Hills, u Dr D. Paswet.
Ïa kane ka prokram la pynïaid da u Assistant Director jong ka tnat Horticulture East Jaiñtia Hills District, u bah S.R.Mulieh.