Nongpoh, Nailar, 18: Da ka jingangnud jong ka sorkar ban kyntiew ïaka jingnang jingstad jong ki khynnah haki laiñ technology nalor ki kot ba ki pule, kawei naki skul nongkyndong ka ba don haka shnong Belkuri ha Ri-Bhoi kaba don ruh hajan khappud bad ka Assam, ka Belkuri Upper Primary School kala ioh syndon da ka Information and Communication Technology (ICT) Labs bala mang lyngba ka skhim naka tnad pule puthi.
Lyngba katei ka ICT Lab katei ka skul ka ioh ruh haduh 9 tylli ki kor komputer, ki kor internet, ka Printer, Projector ban ailad ïaki khynnah skul ba kin ioh jingnang jingtip shaphang ki kor Komputer bad ka jingstad haka liang ka technology khamtam ha kane ka juk stad ka ba mynta ban ïa beh lem ïaka jingstad kumba ioh kiwei haka liang ka kor Komputer.
Ïa katei ka ICT Lab la plie paidbah mynta ka sngi da u Bah Mayral Born Syiem MLA ka Nongpoh kum u kongsan, u Bah V Nianglang DMC- SSA- SEMAM Ri Bhoi District kum u symbud kongsan haka jingdonlang u PP Yadav BMC Umling BRC, Bah Raphael Klein Chairman Managing Committee, ki nonghikai bad ki khynnah skul bad kiwei kiwei ki riew rangbah.
Haba kren ha katei ka sngi naka liang u Bah Mayral Born Syiem kum u kongsan u la pynpaw ka jingsngewkmen kaba khraw ba katei ka skul kadei kawei naki skul ba donbok ban ioh ïa katei ka ICT Lab naka bynta ban nang pynjanai bad ban nang kyntiew ïaka jingnang jingstad ki khynnah pule katkum kane ka juk ba mynta, ba bun naki briew bad ki paidbah kila trei bad pyndep ïaki kam ki jam lyngba ki kor Komputer, bad lyngba katei ka ICT Lab kyrmen ba ki khynnah pule kin dang kiew ka jingnang jingtip.
U la ong ruh ba kum u MLA u la shimkhia ban kyntiew ïaki skul bad ki shlem pule ha Ri-Bhoi naduh ka jingkyrshan ïaka tulop ki nonghikai ka Northern Ri-Bhoi College naka pla lajong bad kiwei kiwei ki shlem pule ha kaba kum u MLA um don kano kano ka jingleh shilliang hynrei ban ïarap kumjuh salonsar ïa baroh, bad kular ruh ban dang pynioh ïaka skul building naka bynta katei ka skul lyngba ka skhim bala mang haki shnong khappud bala tip kum ka Inter State Border Areas Development Program.
