Shillong, Naitung 29: Ka tnat ba dei peit ïa ki kam jngohkai jong ka sorkar pdeng ka la shim bun ki lad ki lynti kumno ban kyntiew ïa ki kam shangsuwari sha ki nongkyndong bad kane ka jingpynshlur la leh lyngba ki website, ki social media ban kyntiew ïa ki.
Ka sorkar pdeng ka la ïohi ïa ka jingdon ka lad ka lynti ban kyntiew ïa ki kam jngohkai pyrthei sha ki shnong nongkyndong ha ka Ri India, da kaba pynshlur ba ki paidbah kin buh ïa ki Homestay.
Ban tip ïa ki jaka kiba itynnad kiba don sha ki nongkyndong, ka sorkar ka la pynlong ïa ka jingïakob ki shnong ba itynnad tam ha u snem 2023 bad ïa ka shnong Raghurajpur hapoh ka jylla Odisha la ithuh kum ka shnong kaba khring bha ïa ki nongwan jngohkai pyrthei ha u snem 2023.
Ka sorkar pdeng ka la lap ruh ïa ki jaka ha ki nongkyndong ban pynïasoh ïa ki shnong ban long kawei ka lynti ban ïaid ban khring ïa ki nongwan shangsuwari lyngba ka skhim Swadesh Darshan Scheme.
Ka sorkar pdeng ka la ai jingkyrshan pisa sha baroh ki sorkar jylla bad ki Union Territory lyngba ka tnad jngohkai pyrthei bad ka jingïarap ka long katkum ki kyndon kiba la buh bad ka shong ha ka jingphah skhim na ki sorkar jylla bad ki UT. Kane ka long katkum ka jingpyntip jong u Myntri ba dei peit ïa ka tnat jngohkai pyrthei u Gajendra Singh Shekhawat da ka jingthoh ha Lok Sabha.
