Shillong Naitung 29: Ki pulit Home Guards kiba don kumba 300 ngut kiba na ka thaiñ Garo Hills bad kiba la shah thung ban pynïaid ïa ki kali ha Tura ki la kyrpad ïa u Myntri Rangbah ka jylla ban pynïoh ïa ki tulop jong ki kaba khlem pat siew ha kine ki 4 bnai ba la leit.
Ha ka shithi ba ki la phah lyngba ka A’chik Progressive Approach, ki Home Guards, kumba 300 ngut kiba don, ki la ong ba kim lah shuh ban pynbiang ïa ki jingdonkam kiba kongsan ha la ki ïing ki sem na ka daw ka jingbym pat ïoh tulop.
Na ka liang jong ki, ki la ong ba katba ki Home guards ha Khasi Hills ki ïoh beit ka tulop bad ki sngew ba ma ki pat ha Garo Hills ki la shah ban beiñ bad shah ieh beiñ, shah pynduh jingkyrmen bad lada kane kam treikam kim banse ban wad noh da kiwei pat ki lad ki lynti ban pynbor ïa ka sorkar ban siew dep noh ïa ki tulop jong ki.
