Mairang, Ïaiong, 13: Kum shibynta ban kyntiew ïa ki nongseng kam la jong bad ki riew don sap ka jylla bad ban ai ha ki ïa ka rynsan ïatei bad phylliew jingmut, ha ka sngi Palei ka ophis jong u General Manager, District Commerce & Industries Centre, West Khasi Hills District Nongstoiñ, ka la pynlong ïa ka District Level Industrial Exhibition kaba ar sngi hapoh Tirot Sing Memorial Hall, Pyndeng-umiong ïa kaba la plie paidbah da ka Additional Deputy Commissioner ka Eastern West Khasi Hills District, ka Kong V.A Hynñiewta.
Kiwei pat kiba la ïadonlang ki long u General Manager ka District Commerce & Industries Centre, West Khasi Hills District, Nongstoiñ, u Bah B.F Sun, kiwei de ki ophisar na ki tnat treikam bapher bapher jong ka sorkar, ki nongïalam shnong bad ki nongseng kam lajong na East Khasi Hills, West Khasi Hills bad Eastern West Khasi Hills District.
Ha ka jingkren kum ka Kongsan ka Kong V.A Hynñiewta, ka la ai khublei ïa ka District Commerce & Industries Centre, West Khasi Hills District na ka bynta ka jingpynlong jong ka ïa District Level Industrial Exhibition kaba nyngkong eh hapoh Eastern West Khasi Hills District, kaba la pynïoh ha ki nongseng kam lajong bad ki riew don sap ka thaiñ bad ka jylla hi baroh kawei, ïa ka rynsan ban pyni ïa la ki sap ki phong.
Ha kane ka exhibition kaba ar sngi, lah ban sakhi ïa ka jingdon jong ki duka kiba kynthup ïa ki dukan die jingbam, ki dukan kiba die ïa ki jingshna bad jingbuh jingsat ba la oh shrong na ki dieng bad siej, ki dukan die jaiñ bad kiwei kiwei de ïa kiba la buh da ki nongseng kam lajong bad ki tnat sorkar kumjuh.
