Nongstoiñ, Ïaiong 13: “Kum ban pynkynmaw ba ki jaka kiba don ha khappud ba ka sorkar Assam ka la knieh jubor ka long kumba 2765.14 square kilomitar”, ong u Bah Hindro Samakha chairman Raidmynsaw.
“Kitei ki jaka ki dei ka Upper Tarabari, Nongpdeng 4.69 sq km, Gizang Reserve forest 13.53 sq km, Hima Rambrai ha ki thaiñ Kyrshai bad ki jaka sha shilliang ka wah Rambrai kiba hap ha ka Langpih Raidmynsaw 298.07 sq km, Borduar 147.83 sq km, Boklapara Nongspung Syiemship 1.57.sq km, Nongwah Mawtamur Nongwah Syiemship 137.51 sq km, Khanapara, Pilangkata Mylliem Syiemship .2.29.sq km, Deshdamorea ka bynta jong ka hima Khyrim bad Khanduli kba dei ka bynta jong ka Raliang 12.80 sq km Pshiar area kba hap ha ka Nongjngi Doloiship 64.00 sq km Rattachera Narpuh Doloiship 11.20 sq km, Block I Jaiñtia Hills 573.54 sq km, Block II kaba hap ha ka Raid Nongtung Khyriem Syiemship 1009.88 sq km”.
“Haba phai ha ka jingshah knieh jubor jong kitei ki jaka ha ka sorkar Assam, ka long kaei kaei kaba sngewsih namar ba ka jylla ka la duh noh ïa ka khyndew ka shyiap kaba dei ka nongkynti jong ki paitbah. Hynrei kaba kham sngewsih ka long ba ki paidbah nongshong shnong kiba shong ha kitei ki jaka ki ju shah pyndik na ka por sha ka por ha ki bor jong ka sorkar Assam”, ong u Bah Hindro.
U la ong, “Watla ka sorkar ka la pynpoi ïa ki jingïarap na ka bynta ki kam pynroi, hynrei haba ki paidbah ki la sdang ban pyntrei ki la shah khang lad noh ha ka sorkar Assam. Ki bor pulit ka Assam ym tang ba ki pynthut tang ïa ki kam pynroi, hynrei ki pyndik ruh wat ïa ki paidbah da kaba tied bad bom naphang, byrngem byrsit bad pynshitom ïa ki khlem kano kano ka daw kaba biang. Katei ka jingleh jong ki pulit ka Assam ka pynlong ïa ki paidbah ba kin im ha ka jingsyier bad rit mynsiem haduh kine ki sngi”.
“Ka jingshah thombor jong ki paidbah nongshong shnong kam dei ruh tang shisien lano, hynrei man ka por ka ju jia namar ki pulit jong ka Assam kim pushe wat tang khyndiat ruh ïa ka sorkar Meghalaya namar ka jingtlot bor sha ba palat”, u la ong biang.
“Haba phai ha kawei ka liang ym lah ban len ba ka sorkar Meghalaya ka la shu burom sah ïa ka Status Quo, kaba ong ba lada ka sorkar Meghalaya ka theh ïa ki kam pynroi ha ki shnong khappud, ka sorkar Assam kam dei ban pynwit bad lada ka Assam ka theh ïa ki kam pynroi ha khappud, ka Meghalaya kam dei ban pynwit”.
“Kitei ki jingïakut kim shym la treikam wat tang khyndiat ruh. Ki dak ki shin bad ki jingjia ki pyni shai kdar ba haba ai surok ka Meghlaya kum na Athiabari sha Umshiak, ha kaba ki pulit Assam ki lah ban pynsangeh hynrei haba ka Assam ka siang rong ïa ka surok na Kamphaduli sha Mawsikar lyngba ka Langpih ym don ba nud ban pynsangeh”.
“Nalorkata haba ka MePDCL ka thmu ban pynpoi bording sha Mawdiangsnam bad Umyiap, ki pulit Assam ki lah ban pynsangeh kat haduh ba ïa katei ka skhim ka sorkar ka la hap ban pynsangeh noh, namar ba ka la ïoh pdiang ïa ka jingthoh na u Kontraktor u ba pyntrei ïa katei ka lain ba um nud shuh ban pyntrei namar ka jingshah byrngem byrsit ha ki pulit Assam ba lada un bteng ban pyntrei kin kem bad pynshitom”.
“Lada ki nongmihkhmat ki dei kiba shlur bad kiba nud, ki dei ban mih shakhmat ban ïalam ïa ki paidbah ban trei bad pan ruh da ki bor pahara kiba biang, khnang ba ki paidbah kin ym kynran dien wat lada ka long kumno kumno ruh” u la ong.
