Pynshlur ïa ki MLA ban kren da ka Khasi bad Garo ha Assembly, kyntu ka HANM ïa u Speaker

Shillong, Rymphang, 14: Ka Hynñiewtrep Achik National Movement ha ka sngi Balang ka la aiti da ka dorkhas ha u Lamphang jong ka Ingdorbar Thawain ka Jylla u Thomas A. Sangma da ka jingkyrpad ban pynshlur ïa ki dkhot jong ka Ingdorbar Thawaiñ ba kin kren da ka ktien Khasi bad Garo haba ki ïashim bynta ha ki jingïatai katkum ba la ai jingbit da ka Rules of Procedures and Conduct of Bussiness, ha ka Dorbar Mang Tyngka jong ka Ingdorbar Thawain ka Jylla ka ban sdang naduh ka 16 tarik mynta u bnai.
U President ka seng, Bah Lamphrang Kharbani ha ka jingïakren bad ki lad pathai khubor u la ong, “kam myntoi ban shu phah tang ïa ka “Resolution” sha ka Sorkar India ban pynrung ïa ka Ktien Khasi bad Garo ha ka Khyrnit Baphra jong ka Riti Synshar ka Ri Inda, hynrei kaba donkam ka long ba ka Ingdorbar Thawaiñ ka dei ban sdang ban ïakren bad ban ïathir ïatai da ka ktien Khasi bad ka ktien Garo ha ki sngi shong dorbar.”
U la ong ruh, “lada ka don ka jingeh ha kaba ïadei bad ka jingbym sngewthuh ïa ka ktien, ka Ophis jong u Lamphang ka Ingdorbar Thawaiñ ka dei ban buh da u nongpylla ktien (translator) khnang ban pynsuk ïa ka jingïashim bynta jong ki dkhot ka Ingdorbar Thawaiñ.”
Ha kaba ïadei bad ka jingdawa ban pynrung ïa ka Ktien Khasi bad Garo ha ka Khyrnit Baphra jong ka Riti Synshar ka Ri India, u President ka HANM u la ong baka seng kan sa nang ïai buddien shwa ban shim ïa ka rai ban pynlong biang ïa ka jingïakhih ha nongbah Delhi ha ka wat kaba ar.