Shillong, Rymphang 14 : Ka Working President jong ka Meghalaya Pradesh Congress Committee (MPCC) ka Deborah Marak ha ka sngi Balang ka la ong ba ka jingdon bun ki MLA ne MDC kam don jingïadei satiaQ
Haba kren bad ki lad pathai khubor, kane ka heh Congress kaba dei ruh ka Myntri barim ka sorkar jylla ka la ong, “Ngi don 24 tylli ki constituency bad tang uwei u MLA Congress. Hynrei ha ka elekshon MP pat ka shong ha ki nongthep vote kam dei satia tang ha ki nongïalam. Kam pher la phi don bun ki MLA ne MDC hynrei kane ka kham pher na kiwei pat ki elekshon.”
Kumta ka la ong ba da lei lei ruh kan ym urlong kumba kam kiwei ki party ba tang namarba ki la don bun ki MLA ne MDC ki lah ban ïoh kham bun ka vote ha kane ka elekshon MP kaban sa long shen ha kine ki khyndiat bnai ban wan.
Shuh shuh ka la ïathuh ba mynta ka party ka la ïaid shaid shaid ban pynkhreh bad pynlong ki jingïalang kylleng na bynta kane ka elekshon ha rilum Garo.
“Ngi la dep ban wan kylleng ki District Headquarter, ngi don ruh ïa ki district president, block president, polling station president bad da kane kum ka kynhun ngi trei lang bad ki paidbah na bynta ka elekshon,” ka la bynrap biang.
Nalorkata, ka heh Congress ka ong ba ki paidbah ha ka thaiñ ki la kwah ban wanrah ïa ka jingkylla, bad da kiwei pat ki nongïalam.
“Ngi don mynta uwei u sing na rilum Garo uba dei ruh u MLA kumba phi tip bad ngi ngeit ba u dei u kyrtong uba paka tam eh ban aireng ha kane ka elekshon bad ma u ruh u la leh ïa kata. U la leit kylleng ki jaka ban kynduh ïa ki paidbah bad ki nongïalam bad ka la don ka jingkyrmen ïa ka party,” ka la ong.
Na ka liang ka Congress dang shen ka la dep ban pynpaw ba na Rilum Garo kin sei da u MLA ba marwei ka party, u Saleng Sangma ban aireng ha kane ka elekshon MP katba na Shillong Parliamentary seat pat la rai ban sei biang da ujuh u MP, kata u Ma Vincent H Pala.
Kumba long haduh mynta hi, dei tang ka BJP bad ka TMC kiba khlem pat pynbna ïa ki kyrtong jong ki katba kiwei pat ki party ki la dep ban pynbna lut.
