Pynshai u Ma Vincent Pala ïa ki mat treikam jong ka party Congress ha ka shnong Nongwan

Khliehriat, Rymphang 13: Ha ka jingïalang ïalap election, ba la pynlong mynta ka sngi ha shnong Narwan, u bah Vicent,H,Pala, uba dei u kyrtong jong ka Congress party, na ka 5-Sutnga Saipung Constituency bad uba dei ruh u MP jong ka Loksabha, mynta ka sngi u la pynshai paidbah ïa ki mat treikam jong ka party Congress na ka bynta ban kyntiew ïa ka thaiñ bad ïa ka jylla baroh kawei bad ha kane ka election MLA, 2023, u la sdang ïa ka jing ïalap election nyngkong eh na kane ka shnong Narwan, u la pynpaw ruh ïa ki jingangnud jong u ban wanrah ïa ki jingkylla kiba bun hapoh ka constituency bad ha ka District baroh kawei, lada u jop ha kane ka MLA election kaba long mynta u snem.
Utei u kyrtong u la pan ruh ka jingkyrshan na ki paidbah ba kin kyrshan lem ïa u ba un poi sha ka thong ba un dup ïoh ka lad ban pynurlong ïa ka jingangnud jong u, ka ba long na ka bynta ka bha ka miat ki paidbah ruh ban wanrah ïa ka roi ka kiew ha ka imlang ka sahlang.
Haba kren shaphang ka pule puthi, u la kular ba un ai ka jingiatreilang bad ki skul ba pynïaid da ki niam, da ki organisation khnang ban kyntiew ïa ka pule puthi “Lada poi sha ka thong, ngin ïarap ïa ki nonghikai kiba na ki skul niam, ki skul ba pynïaid da ki organisation ba kin biang ka tulop, ha kajuh ka por ki khynnah skul ruh kin ïoh ïa ki nonghikai kiba bha, lada duna palat ka tulop ka eh ban ïoh ïa ki nonghikai kiba biang”
La ong ruh ba hapoh ka party Congress, ki la don ka jingthmu ban shna ïa kawei ka ïew kaba kyrpang kaba na ka bynta ki kynthei ba kin ïoh ban shong dukan, ba kin ïoh ban kamai die jingdie ha ki sem dukan, namar kiba bun ki kynthei, ki longkpa ki shu shong dukan ha ki rud surok katba u bar jylla pat u ïoh ban shong dukan ha ki ïing, ki sem dukan kiba bit ba biang.
U pynpaw ruh ka jingsngew khia halor ka jingbym biang ka bor ding bad kular ruh ba lada ka party kan poi ha ka bor, ha ryngkat ka jingïatreilang bad ki bor shnong, ka party kan ïarap ïa kito ki briew kiba duk, ki bym lah ban siew ïa ka bai bor ding, ban ai ha ki ïa ka bor ding kaba 200 unit, ka bym donkam ban siew pisa ba ki khun kin ïoh ban pule kot ha ka jingshai ka bor ding.
Kumjuh ruh, u kular ban pynioh ïa ki lad iohkam ïoh jam ïa ki briew ban kyntiew ïa ka ioh ka kot jong ki, da kaba wanrah ïa ki nongseng kam (Investors) kiba na bar, kumjuh ruh da kaba wanrah ïa ki shlem pule (University), ban pynheh ruh ïa ka jingioh bor ding da kaba shna shuh shuh ïa ki dam ban pynmih bor ding, ba ka bai bor ding ruh kan long kaba jem dor bad lada jem dor ka bor ding, kiba bun ki karkhana lah ban pynurlong kumjuh ruh ba ki briew kin ïohkam.
La ong ruh ba na ka liang ka party ka la dep saiñdur lypa ba ki briew kin ïoh ïa ki ïing, ki sem kiba bit ba biang bad halor kane ruh, donkam ka jingïatreilang bad ki bor shnong, u kular ruh ba lada un wan ha ka bor, na ka liang ka sorkar kan buh ïa ka pisa T.500 klur tyngka, ban buh ha bank bad na ka sut jong kane ka pisa, lah ban shna ïa ki surok, ki lynti ki syngkien, ban pynbiang ïa ka um, ïa ki jingdonkam ki paidbah ha ki por ba don kino kino ki jingiseng heh lane ha kino kino ki lympung ba heh jong ki paidbah, kumjuh ruh ban buh ïa ki committee bapher bapher ki ban peit ïa ki jingdonkam ki paidbah.
Kumjuh ruh, u kular ba lada ka party kan wan ha ka bor, kan kyntiew ruh ïa ka koit ka khiah jong ki paidbah da kaba pynbit pynbiang bha ïa ki jaka ai jingsumar “Lada ngi ïoh ïa ka spah ka phew ka long lehnonhei lada ngim ïoh ïa ka koit ka khiah”
Kiba la ai jingkren ki kynthup ruh u MDC barim jong ka thaiñ, u bah Philip Tangliang, u bah Sunday Bamon, u bah Tip Syrti, u bah Minot Lapasam bad kiwei kiwei, kiba la buh ka jingkyrpad bad kyntu ïa ki paidbah ba kin ai ka jingkyrshan ïa u bah Vincent.H.Pala ba un poi sha ka thong ha kane ka ïakhun ïa ka MLA election khnang ba ki jingkylla kin wan hapoh ka constituency ki ban long ka jingmyntoi ïa ki paidbah ha baroh ki liang.