Nongstoiñ, Naiwieng 20: Halor ka jingkynthoh ki katto katne ki Contractor lyngba ka jingphah pyllait khubor, kiba la pynpaw ka jingud jingkhñium ïa ka jingbym ïoh bill na ka jingpyntrei ïa ka skhim Jal Jeevan Mission ha Nongstoiñ Division, u Executive Engineer ka tnad PHE Nongstoiñ Division u Bah Dennis Shabong, haba ïakren bad u nongthoh khubor ha ophis treikam jong u mynta ka sngi, u la pynpaw ba kiba dang sah hi ki Bill ki dei naduh u bnai Naitung 2024 haduh mynta, lait nangta baroh la dep ban pynkhuid lut.
Shuh shuh u la ong ba ka jingbym ïoh fund mynta naduh u Naitung ter ter haduh mynta ruh ka dei ka jingbym lah ban pyndep ïa ki jingtrei hapoh u 2024. Ha ka jingshisha u la ong ha Nongstoiñ Division ki tiar ki tar ban trei kum ki pipe um bad kiwei ki la don lut shwa ban pynkut ïa kane ka skhim katkum ka por ba la buh. Kumta ka shong ha ki Contractor ban pyndep ïa ki jingtrei.
Haba ïakren halor ki jingsiew Bill, u la ong ba kaba kham kongsan eh ba baroh ki dei ban sngewthuh ka long ba ha kane ka skhim jong ka JJM, ka dei beit ba lada la pyndep lut ïa ki jingtrei katkum kaba la pruid dak bad ai jingtrei, na ka liang ka ophis ruh ka ïaleh ban pynsted katba lah ban pynkhuid bad siew pyndep.
Shuh shuh ha ka jingïakren u Bah Shabong u la ong ba ha ka jingpyntyllun ïa kane ka skhim, kaba ka sorkar India ka thmu ban pyndep hapoh ka 31 tarik Lber 2024, ki don ki Contractor kiba pyntrei bad pyndep ïa kane ka skhim katkum ki kyndon ka JJM, ha kaba na ka liang ka tnad ruh ka siew dep noh khlem pynsah.
Hynrei, u ong ba ki don ruh ki Contractor kiba ïoh jingtrei kum ki jingtrei ban shna san tylli ki top um, ha kaba ynda dep tang ar tylli ki kwah ïoh pisa noh. U la ong ba ha ka skhim JJM kam long kumta kum kiwei pat ki skhim ha ki snem ki por ba mynshuwa. Ha ka skhim JJM watla la pyndep lut shwa baroh ruh, hynrei shwa ban ïoh bill hap ban ïaid shwa lyngba ka Village Water Sanitation Committee, nangta na ka kynhun jong ka 3rd party kiba hap ban leit sha ka jaka ba trei bad kumta ter ter.
Mynta lei lei ki la nang mih shi mih ki kyndon hapoh kane ka skhim bad dang shen ka mih ka kyndon ba kito ki contractor kiba aplai ïa ka 10 percent ruh, ki hap donkam ïa ki kot ki sla kiba biang bad hap ïoh jingbit wat na ki shnong ba ki ïoh jingtrei ban pyntrei ïa kane ka skhim.
U la ong ruh lehse hadien u Lber 2025 ka jingwan fund kan kham eh khyndiat. Tangba u la ong ba na ka liang ka ophis kan leh ïa kaba bha tam ban pass bill sha ki Contractor, khamtam eh ynda poi biang ka fund jong kane ka skhim na ka bynta kine ki bnai ba dang sah.
Haba pynpaw ïa ka jingkyrkhu jong kane ka skhim Jal Jeevan Mission na ka bynta ki shnong kyndong kynshrot jong ka West Khasi Hills, u Bah Shabong u la ong ba la jan baroh hi ki shnong ki la myntoi. Kito kiba sngewthuh bad kiba kloi ban ïatreilang lei lei, ki kham ïoh kloi ruh ïa ka umbam umdih kaba biang.
U la ïathuh ba hapoh ka PHE Nongstoiñ Division, ki don palat 620 shnong kiba kane ka skhim ka treikam. Kine ki kynthup ïa ki shnong kyndong ka Nongstoiñ, Mawthadraishan, Mawshynrut bad katto katne shnong kiba hap ha South West Khasi Hills.
Ka kam hi kam dei kaba suk naduh ba la sdang pyntyllun ïa kane ka skhim ha u snem 2019. Ki don ki shnong ki bym sngewthuh hi ruh ïa kane ka skhim bad kynthoh kylla ïa ki briew ka tnad kiba wan ban pynshai sha ki shnong jong ki, ong u Bah Shabong.
Nangta ki don ruh kumba saw shnong ha khappud ka thaiñ Langpih ba kynthup ïa ka Dolidonga, Ukiam, Gorkhali bad Hasem, kiba ka ophis hi kam lah leh ei ei bad shu ieh kumto namar ka jingïatyngkhuh bad ka Assam, ha kaba ki bor na Assam kim shah kim ailad ban pyntrei.
Ki don ruh ki shnong ha ka thaiñ Shallang jong ka Mawshynrut, kum ka Mawkhap, Riangba bad Umdang ki bym treh ïa ka pumping skhim bad kwah da ka gravity. Namar kata ha kine ki shnong ruh hap ban pynshai bad kumjuh ruh la hap leh thymmai biang lane revise biang ïa ka estimate.
U Bah Dennis Shabong Executive Engineer ka PHE Nongstoiñ Division, u la ong ba kat kane ka skhim kaba heh kaba long ka jingkyrkhu ïa ki shnong ki thaw, ka donkam ruh ïa ka jingïatreilang naduh ki bor shnong khamtam eh, nangta ki contractor ba pyntrei ïa ki jingtrei. Namar ka ophis hi kumba long mynta ka duna nongtrei palat lane kata ka man power. Ka don 7 ngut ki G.E bad tang uwei u S.D.A ryngkat ki muster roll ban pyntyllun ïa ka kam.
