Pynshai u DC EJHD halor ka jingjia ha Lumshnong, kyntait ba kam dei kumba phriang ha ki video

Khliehriat, Nailar 29: U Deputy Commissioner, East Jaiñtia Hills District, u Abhilash Baranwal, IAS lyngba u kyrwoh u pynshai paidbah halor ka jing jia mynta ka sngi kaba la jia ha Lumshnong kaba la jia katba u dang thmu ban leit sha kawei ka jingialang Annual Day Celebration ka ba long ha Divine Words Secondary School, Lumshnong bad ban ai jingkren ha ka jingïalang bad u Project Director, DRDA, East Jaiñtia Hills District, Block Development Officer, Lumshnong C&RD Block, kumjuh ruh bad ki Gram Sevaks bad ki BTAs jong katei ka Block, la ong ba ha katei ka por ka la don ka jingdheng kali kaba jur bha naduh surok national highway Thangskai haduh Wahiajer na ka daw ka jingbum ki kali kiba sniew ha lynti ha ki jaka bapher bapher.
Naka liang u DC u la ong ba ka jingsaphriang ïa ka video ka long ka bym shonghok bad kaba dei ban shim ïa ki jingpynshitom lem kumta kan buh ka jingbym shngaiñ ïa kiwei pat kiba ïaid lynti na kane ka surok bad ha kaba iadei bad ka jingsaphriang ka video kaba pyni ba u PSO jong u DC uba la ktah kti ïa u nongñiah kali, na ka liang u DC ula pynshai ba kane kam shym la long kumba la sakhi ha kane ka video.
U la ong ba u nongñiah ïa ka kali jong u, u la ai dak ban pyllait ïa ka dheng kali, u la shah pyni bor ha uwei u ba ñiah ïa ka kali Mahindra Pickup kaba don u number ML 11 4554 bad katba ka jingdheng kali ka dang lait suki suki, u nongñiah ïa ka kali u DC ruh u dang ai dak ïa kiwei ki kali ba kin ailad ïa ka kali u DC ban ïaid shakhmat bad uba ñiah ïa katei ka Mahinra Pickup pat u la kyntait ban ailad ïa ka kali u DC ban iaid, te namar ba u Personal Security Officer jong u Deputy Commissioner uba ju don lang bad u dang pyrshang ban pyllait ïa ka jingdheng kali bad u Deputy Commissioner u la leit hajan u nongñiah jong ka Mahindra bad kyrpad ïa u ba un pyllait lynti bad ong ruh ba utei uba ñiah ïa ka Mahinra u la buaid kyiad bad la iai bthah ruh ïa u ba un kynriah ïa ka kali.
Ha katei ka jingjia, la ong ba u Deputy Commissioner bad u PSO jong u ki la shah kynthoh jur pynban da ki ktien khlemakor bad shah bitar ha ki briew bad hangta ka la don ka jingia khuluit, te na ka liang u DC u la pyrshang ban pynshai khnang ba kan nym ïaid sha jngai, hynrei um shym la iohlad satia, Ka la don ka jingpyrshang ban knieh ïa u shabi kali khnang ban khanglad ïa utei u draibar ba un jam shakhmat, hynrei uba ñiah pickup u la pyni bor pynban, te u Personal Security Officer jong u pat kumba dei ka kamram ban ïada ïa u DC u la pyndonkam da ka bor kaba khyndiat eh (minor force), na ka daw ka jingkhlemakor u nongñiah pickup ban pynia jngai ïa u DC na utei u nongñiah pickup.
Hynrei, na ka liang u DC u la ong ba ma u ryngkat bad une u PSO jong u ki la shah kynthoh kiba la pynmih da ki ktien khlem akor bad ktien sih kata wat hadien ba ki la pyrshang ban pynshai halor kane ka jingjia baroh.
Nalor kata kine ki briew ki la pyrshang ruh ban khang lynti ïa ka kali jong ki, hynrei dei tad hadien ka jingwan tuklar jong ki trai shnong ba la lah ban pyllait suk ïa ka kali jong ki ba kan iaid shakhmat.
Hadien katei ka jingjia ïa uba ñiah ïa ka Mahinra Pickup la rah noh ban leh ïa ka medical test ha kaba la sakhi bad pynshisha ruh ba u la dih buaid bad ba um biang shuh ban ñiah ïa ka kali ha katei ka por.