Khliehriat, Jymmang 12: Ka ophis jong u District Medical & Health Officer (DM&HO), East Jaiñtia Hills District lem bad ka ophis jong ka National Programme for Control of Blindness & Visual Impaired, National Health Mission, Shillong ha ryngkat ka jingïatrei lang bad ka Association of Community Ophthalmologists of India (ACOIN) Drishti Ratha Yatra, hynnin ka sngi ka la pynlong ïa ka prokram ai jingpynshai bad pynlong ruh da ka jingiaid rally kaba la tip kum ka Eye Awareness Campaign, ïa kane ka prokram la pynlong ha K.B. Memorial Higher Secondary School, Wapung Skur, East Jaiñtia Hills District.
La sdang ïa ka program da ka jingiaid rally na Pamra-Paithlu PHC sha KB Memorial Higher Secondary School, Wapung Skur ba la ïa shimbynta lang da ki khynnah skul, ki nonghikai lem bad ki nongtrei kiba na ka tnat ka koit ka khiah na East Jaiñtia Hills District bad da kaba rah ïa ki tableau, ki banner kiba don ki jingthoh bapher bapher, ki poster jong ka National Programme for Control of Blindness kum ka jingpynsaphriang ïa ka khubor sha ki paidbah halor ka jingdonkam ka bor iohi ne ka vision.
Ha ka prokram u National General Secretary, Association jong ka Community Ophthalmologist, Dr. Swapan K. Samanta u la ong ba ïa kane ka Association jong ka Community Ophthalmologists of India ka dei kaba la seng naduh 25 snem mynshwa bad ha kane ka kynhun ki don haduh kumba 1700 ngut ki ophthalmologists kiba dei ki doctor ne ki specialist kiba dei peit ïa ki khmat kiba treikam ha baroh kawei ka ri India, u la pynsngew ïa ka jingiaid lynti jong ka kynhun kaba iaid ha kiba bun ki jaka ha ri India ha kaba kane ka kynhun ka don ka jingthmu bad buhthong ban kyntiew ïa ki jaka sumar khmat ne ki Eye healthcare bad ruh ban pynlong ïa ki prokram ai jingpynshai paidbah ha ki shnong ki thaw.U la ong ruh ba bun ki briew ki duh ïa ki jingioh jingmyntoi dei na ka daw ka jingbym shim khia bad jingduna ki lad ai jingtip ne communication, u la ong ba ki lad ai jingiada ban lait na ka jingmatlah ka dang iai bteng bad bun ki khynnah kiba don jingshitom ha ki khmat ki duh ïa ki lad ioh jingmyntoi ki ban kyrshan ïa ki.
U Dr. Samanta u la ong ba ka thong jong kane ka kynhun ka long ban iaid lynti ban pynshai paidbah khnang ba ki briew kin dup ioh ïa ki lad jingsumar ba ïadei bad ka jingshitom ha ki khmat bad ba kin ioh ïa ki lad jingiarap ki ban long ka jingmyntoi bad kyrshan ïa ki.
Haba kreh shaphang ka jylla Meghalaya, u Dr. Samanta u la ong ba ki dang don bun ki district kiba ym pat don satia ki jaka sumar khmat kiba biang ne ki ophthalmologists bad ïa ki jaka sumar khmat la pyniaid da ki nongtrei ne ki ophthalmic assistants, u la kren ruh halor ka jingdonkam ban pynsaphriang khubor sha ki paidbah ba ki briew kin ioh ïa ki lad jingiarap ne ki jingmyntoi ba ki dei ban ioh, u la ong ruh ba kane ka jingiaid lynti jong ka kynhun ka dei ruh shibynta jong ka kynhun All India Programme ba la aimynsien lyngba ki jinghikai jong u Swami Vivekananda, ban pynshlur ïa ki paidbah ba kin mih shakhmat ba kin tip ïa ki lad jingiarap ba ki dei hok ban ioh na ki jaka ai jingsumar.
Ha kane ka prokram la ailad ruh ïa ki khynnah skul ba kin kren ha kaba ïadei bad kane ka jingiaid lynti ka kynhun bad la ai da ki medal ïa ki khynnah kiba tbit ban kren.
Shuh shuh ha kane ka prokram la don ruh ka ‘Vision Check Up ïa ki khynnah skul bad la pynlong ïa kane da ka Ophthalmic Assistants East Jaiñtia Hills District ha K.B Memorial Secondary School, Wapungskur, East Jaiñtia Hills District bad kaba kum kane ka prokram la pynlong ruh ha ïing community hall ha Wapungskur.
Ha kane ka prokram la ïa don ryngkat lang ruh u District Medical & Health Officer (DM&HO), East Jaiñtia Hills District, Dr D. Shylla, Sub-Divisional Medical & Health Officer (SDM&HO), East Jaiñtia Hills District, Dr W. Bamon, Principal of K.B Memorial Secondary School, Wapung Skur, East Jaiñtia Hills District, Dr. Heipor Uni Bang, ki nonghikai, ki khynnah skul lem bad ki nongtrei kiba na ka tnat ka koit ka khiah na East Jaiñtia Hills District.
