Pynshai ka DS Ladrymbai Khliehdupon ba u Abdullah Hussain um dei u nongshong shnong ha Ladrymbai

Khliehriat, Naiwieng 16: Ka Dorbar Shnong Ladrymbai Khliehdupon, ka pynshai ba u Abdullah Hussain uba la shah kem hynnin ka sngi ha ki pulit jong ka Ri Bhoi District, um dei u nongshong shnong jong ka shnong Ladrymbai Khliehdupon kumba u la kam, hynrei u dei tang uba shu wan ban shong die dukan ha Ladrymbai Khliehdupon.
Kumba la paw ha ki pathai khubor, ki pulit jong ka Ri Bhoi District, hynnin ka sngi ka la kem noh ïa u Abdullah Hussain bad u Sanborlang Khaiong, halor ka jingthmu jong ki ban khaïi beaiñ ïa ki biskit ksiar kiba shong dor da ki klur tyngka, ki pulit ki la kurup ïa kine ki ksair na kawei ka kali scorpio kaba don u registration number AS 01 J 6407, kaba dang wan na Ladrymbai bad thmu ban leit sha Assam.
U Waheh Shnong jong ka Shnong Ladrymbai Khliehdupon, u bah Marius Siangshai, u ong ba ka Dorbar Shnong ruh ka pynrem jur ïa utei u bar jylla uba la pynjah burom ïa ka shnong ka thaw bad ong ba ym dei satia ban ailad ïa kum kine ki jait briew kiba thmu ban pynjah burom ïa ka shnong.