Shillong, Jymmang, 15: Ka District TB Office, East Khasi Hills District kaba la buh hakkhmat ïa ka thong ban pynlong ïa ka East Khasi Hills District kaba lait na ka jingpang Tuberculosis (TB) dang shen ki nongtrei jong kane ka ophis ki la hiar sha ka shnong Khatarshnong, East Khasi Hills District ban pynsngewthuh ïa ki paidbah ha kaba ïadei bad ki lad jingïada ban kiar na ka jingïabit ïa ka jingpang Tuberculosis (TB).
Da ka jingïatreilang bad ka Department of Social Work, St. Edmunds College, Shillong ka District TB Office, East Khasi Hills District ka la lum ïa ki paidbah nongshong shnong ban ai jingpynshai ha ka shnong Mawutieng, Khatarshnong ha kaba la ïashim bynta lang da ki khynnah skul bad ki nonghikai.
U Senior Tuberculosis Laboratory Supervisor u Bah Dajied S. Dkhar haba kren ha kane ka jingai jingpynshai u la pynshai shaphang u khñiang jingpang Tuberculosis, kumno u saphriang, ki dak ki shin kiba paw shabar, ki lad jingïada bad ki lad jingsumar.
U Bah Dkhar u la iaroh ruh ïa ka shnong Mawutieng kaba la long ka nuksa ïa kiwei pat ki shnong kiba don hapoh ka thaiñ Khatarshnong, ka bym pat don satia wat tang iwei ruh napdeng ki nongshong shnong kiba don ïa ka jingpang TB tad haduh kine ki sngi.
U Senior Treatment Supervisor u la pynshlur ïa ki nongshong shnong ban ïada ïalade na ka jingïabit ïa ka jingpang Tuberculosis khnang ba kan ïarap ïa ki para nongshong shnong ban pynlong ïa ka shnong Mawutieng kaba lait na ka jingpang TB.
Hadien kane, ki samla pule jong ka St. Edmund’s College bad ka Unna Bharat Abhiyan ki la ïashim bynta sa ha ka phawar halor ka jingpang TB kum shi bynta ban pynsngewthuh kham bha ïa ki paidbah nongshong shnong ïa ki lad jingïada na ka jingïabit ïa ka jingpang TB ka ban long kum u kyrwoh ban phah sha ki parabriew bad kum ka sienkam ban pynduhjait ïa ka jingpang TB.
Ha kane ka sngi, la sam ruh ïa ki khusnam sha ki nongjop ha ka jingïakop dro. Ka jingpynshai paidbah halor ka jingïada na ka jingpang TB kam da long than tang da kaba ai jingkren hynrei lyngba ki jingthoh ha ki Poster bad ki Banner.
Lyngba kane ka jingpynshai paidbah, la sakhi ïa ka jingïashim bynta pura jong ki paidbah kynthup ruh u Rangbah Shnong u Bah Lamphrang Nongrum, ki Executive Members, ki khynnah skul jong ka Mawutieng UP bad LP School lem bad ki nonghikai.
