Shillong, Ïaiong 10 : U Myntri ka tnad Pule Puthi ka sorkar jylla, Rakkam A Sangma ha ka sngi Palei u la pyntip ba ka sorkar jylla ka la rai ban pynsangeh shwa shipor ïa ka jingkhot rung klas ha ki jaka pule na ka bynta kito ki khynnah ba dang shu ïoh ïa ka result jong ka Secondary School Leaving Certificate (SSLC).
Katkum ka jingïathuh jong u, ka sorkar ka dang pynkhreh mynta ban kyntiew kyrdan ïa ki Secondary School sha ki Higher Secondary School ha kylleng ki bynta jong ka jylla hadien ba ka la don ka jingkiew kynsan ka jingdon ki khynnah ba pass ïa ka matrik kaba la kot haduh 87.10 persen na ka 55.80 persen ha ka result jong u 2024.
Haba kren bad ki lad pathai khubor, u Myntri u la ong ruh ba ka sorkar kam don jingeh ei ei ban tehlakam halor ka jingpynrung klas ha Shillong namar ka jingdon kiba pass ka long beit 70-80 persen kumne man u snem tangba u ong pat ba ka jingeh kaba kham jur kan dei ha ki distrik nongkyndong.
“Ngin kynduh ïa baroh ki Khlieh Nongpynïaid ia ki jaka pule bad ngan sa kynduh ruh ïa ki Deputy Commissioner jong ki distrik ka rilum Garo ha ka taiew ban wan,” u la ong.
U ong ruh ba ka sorkar ïa mynta ka dang shimkhia ban kyntiew kyrdan shwa ïa ki Secondary sha ki Higher Secondary.
“Ngi pynshlur ïa ki skul kiba ïoh ïa ka grant-in-aid na ka sorkar bad kin kham shim bun ki khynnah bad ruh ban sdang ïa ki morning section bad ha ki katto katne ki jaka pule jong ka sorkar, ka sorkar kan sa sdang noh ïa ka morning section,” u la ong.
U ong ba kane ka sienjam kadei namar ki ïohi ba kin don palat 20,000 ngut ki khynnah skul kiba mih tam na kaba ju long barabor.
U Myntri u ong ba kane ka jingpynsangeh shwa ïa ka Admission kadei namar ki kwah ban ïohi shwa ba katno ngut ki khynnah kin lah ban rung ha ki jaka pule jong ka East Khasi Hills, Ri Bhoi District bad Jowai.
Katkum ka jingïathuh jong u, ki don kumba saw tylli ki Secondary kiban sa kyntiew kyrdan noh sha ka Higher Secondary School, kata lai tylli ha Khasi bad Jaintia Hills bad kawei pat ha rilum Garo.
“Ngin dang kynduh ïa ki jaka pule bapher bapher, ban ïa kren lada ka jingpynrung klas ka la dap lut, ba kin sdang noh da ka morning section lane wanrah noh da la ka jong ka section. Da kaba leh kumne ngin sa lah ban pdiang klas lut ïa baroh ha ka jylla,” u la ong.
