Shillong, Iaiong 11 : Uwei u Pulit Home Guard jong ka jylla Meghalaya uba la tip kyrteng kum u bah Ribok Dkhar Sawian uba dei na ka shnong Mawryngkneng, East Khasi Hills u la duh ei ïa la ka jongka jingim da kaba la suba jur ba u shah pyniap ha ki riew thrang snam ha ka nongbah Guwahati.
Une u rangbah uba la trei kum u Pulit Home Guard mynta la arsnem ei ei u don sha nongbah Guwahati ban leit shah pyntbit ha kawei ka jaka ai jinghikai pyntbit ryngkat bad ki paralok jongu. Hynrei la ïathuh da ki paralok ba u la jah rngai na katei ka jaka shah pyntbit naduh ka janmiet 9 tarik ïaiong 2025 ha ka por kumba 6.30 pm eiei bad u khlem wan phai shuh tad haduh ka step kaba bud ruh.
Haba ki paralok ki la i lyngngoh ia ka jingjah rngai jongu kumta ha ka step 10 tarik ïaiong 2025 ki la pyrshang ban leit wad kylleng ki jaka ba marjan hynrei kim lap satia ïa u. Kumta ki la leit ban ujor noh sha ki bor pulit ka nongbah Guwahati bad haba ki la sei ïa ka dur jong u ki pulit ki la ïathuh ba ki la lap ïa ka metiap jong u na ka jaka ba kham jngai na katei ka jaka shah hikai pyntbit bad la suba jur ba u la shah pynïap ha ki runar bym lah ban ithuh.
Haduh mynta ki bahaïng kim pat ïoh ban wanrah ia ka met sha ka jylla namar ki dang ap ban pyndep ïa ka post mortem kaba yn pyndep ha ka 11 tarik ïaiong ha ka Assam Institute of Medical Sciences and Para-Medical Academy. Kiba haïng ki sah ha ka umdum kaba khraw halor kane ka jingjia ïa u bah Ribok bad ki kyrmen skhem ba ki bor ka aiñ kin shim khia ban tohkit ban lap ïa ki briew kiba donkti halor kane ka jingjia.
