Pynsangeh shwa ki CM ïa ka jingïakren pynbeit pud ba dang ïaid ka jingphiah Constituency ha Assam

Shillong, Naitung 13 : U Myntri Rangbah ka jylla u Conrad K Sangma mynta ka sngi Palei ula pyntip ba la pynsangeh shwa ïa ka jingïakren pynbeit pud jong ka wat ka ba ar hapdeng ka Meghalaya bad Assam namar ka jingïaid ka kam phiah Constituency jong ka Election Commission of India (ECI) ha Assam.
“Haka jingshisha, mynta ka taiew ngi la ïa pynbeit bad u Myntri Rangbah ka Assam u Himanta Biswa Sarma ban leit jurip ïa ka thaiñ Khanduli, West Jaintia Hills hynrei namar ba ka don ka jingphiah konstitwensi hapoh katei ka jylla, la hap ban pynkynriah noh ïa kane ka kam sha kawei pat ka tarik” la ong u Conrad.
U Conrad ula ïathuh ba na ka liang u Myntri Rangbah ka Assam ula kyrpad ïa ka sorkar Meghalaya ban pynbeit noh ïa ka tarik ba thymmai ban leit jurip ïa ki jaka ha ki thaiñ khappud hashuwa ban sdang noh ka jingïakren pynbeit pud jong ka wat kaba ar.
“Hashuwa ban kut une u bnai, ngin sa leit jurip ïa ka thaiñ Khanduli hynrei ha kajuh pat ka por ruh ki Chairman jong ki Regional Committee kin dang leh bad pyndep kaba donkam haba ïadei bad ka jingsdang noh ïa ka jingïakren pynbeit pud” ula ong.