Pynsangeh shipor ki nongtrei ka NEHU Tura Campus ïa ka jingïakhih ba kular u VC bad Pro VC

By Mawphor Editor On Jul 5, 2026

Tura, Naitung 4: Ka NEHU Tura Campus Staff Welfare Association ka la pynsangeh shipor ïa ka jingïakhih jong ka hadien ba ki la ïoh ïa ki jingkular na u Vice Chancellor bad Pro Vice Chancellor jong ka skulbah, hynrei ki la maham ba ka jingïakhih kan sdang biang lada ym lah ban pyndep ïa ki jingkular.
Kane ka rai ka long hadien ka jingïalang lyngba ka video conference bad ki bor pynïaid jong ka skulbah ha ka 1 tarik u Naitung, ha kaba ki nongtrei ki la ong ba la kular ba ïa ki mat jingdawa kiba la slem kiba ïadei bad ka jingeh yn sa pynbeit.
Ha ka shithi sha u Vice Chancellor, ka association ka la ong ba ka la rai ban pynsangeh noh ïa ka jingiakhih da kaba pyntreikam mardor katkum ki jingkular ba la ai da ki bor pyniaid jong ka skulbah.
Hynrei ka la ban jur ba ka jingpynsangeh ka long tang shipor bad ba yn sa bishar bniah biang ïa ka jingïakhih lada ki bor pyniaid kim lah ban pynurlong ïa ki jingkular jong ki hapoh ka por kaba buh.
Ka association ka la kyrpad ruh ïa ki bor pyniaid jong ka skulbah ba kim dei ban shim ïa kano kano ka jingpynshitom pyrshah ïa ki nongtrei kiba ïashim bynta ha katei ka jingiakhih.
Ka jingïakhih, kaba la sdang ha u bnai ba la dep, ka la pynshong nongrim ha ki mat kiba dang sahteng kiba ïadei bad ka jingshakri, kynthup ïa ka jingpyntreikam ïa ki hukum jong ka DoPT, ka jingbishar bniah ïa ki jingkiew kyrdan bad ki jingpynhiar kyrdan, ki jingmyntoi ba la ai ka jingpynrung kyrteng ha ka EPF na ka bynta ki nongtrei kiba dei hok bad ka jingsiew tulop ha ka por kaba biang ïa ki nongtrei casual.
Ïa ki kopi jong kane ka shithi la phah sha u Pro Vice Chancellor jong ka NEHU Tura Campus, u Myntri Rangbah ka Meghalaya u Conrad K. Sangma, ki Heads of Departments and Sections, bad ki kynhun samla pule, kynthup ïa ka Post Graduate Students’ Union (POSU) bad ka Garo Students’ Union (GSU).
Haba pynsangeh noh ïa katei ka jingiakhih ïa ka bynta mynta, ka seng ka la kren shai ba ka rukom treikam jong ka ha ka lawei kan shong ha ka rukom ba ka skulbah kan jubab ïa ki jingdawa jong ka.