Shillong, Iaiong 13 : U Vice President ka BJP ha Meghalaya bad u MDC ka Tura u Bernard N Marak ula pynrem jur ïa ka jingleh sang da kaba pynjot pynpra jong ki runar ïa u Maw Motdur jong u Trai Jisu Khrist ha ïew Chibinang da kaba u ong ba kane ka long kaei kaei kaba pynkyndit bad ka jingjia kaba sngewsih kthang.
U Marak uba la leit jngoh ïa ka Chibinang hadien ba la jia ki jingkulmar ba jur u la lap ïa une u Maw Motdur jong u Trai Jisu ha katei ka ïew bad u la ong ba katno ka long ka jingpait dohnud ban ïohi ïa ka jingshah pynjot pynpra bad kane ka long kum ka dak ka jingpynhiar kput wat ïa ki Khristan ruh da ki bar jylla. “ Kum kine ki jingleh ym tang ba ka long pyrshah ïa ka aiñ hynrei ka wanrah ruh ka jingsngew ïapher niam bad ka long kum ka jingïuhroit ïa ka jingmane niam ba laitluid kaba la pynkup bor da ka Riti Synshar jongka ri India” ong u Marak.
U la ïathuh, “ Kat kum ka jingïathuh ki trai shnong kitei ki paidbhur ki dei ki bar jylla kiba wan rung tuh sha India kiba la shah pynshit pynshoi ha u MLA ba rim bad MDC u Esmatur Mominin. Ki la ïathuh ba ka dei ruh katei ka kynhun kaba leh ïa ki kam pynkulmar da kaba thang ïa ki dukan ki ïing briew bad ka jingpynjot pynpra ïa utei u Maw Motdur jong u Trai Jisu Khrist ruh”
U la pynpaw ka jingsngew khia jur ba ym shym la don ba ujor ejahar halor katei ka jingjia bad nalor kata ym don wat tang kawei ka lad pathai khubor ruh kaba pynpaw pyrthei ïa katei ka jingjia.
“ Ngan sa ujor ejahar hi ma nga halor ka jingjia bad dawa ba dei ban leh da kaba tyngeh kat kum ka aiñ ïa kitei ki briew kiba donkti ban pynjor pynpra ïa utei u Maw Motdur jong u Trai Jisu.” pynkut u Marak.
