Tura, Jylliew 30: U MDC ka BJP ka Tura u Bernard N Marak u la pynrem jura ka sorkar Congress halor ka rai ban wanrah a ki Municipal ha Meghalaya ha ki jaka ba don ka Sixth Scheduled ha ki snem 1970, ha kaba u la kynnoh ba ka la pyntlot noh ïa ki hok jong ki trai ri trai muluk.
U Marak u la ong ba kane ka jingwanrah ka la pynkheiñ ïa ka Article 243 ZC bad ïa ka jingïamynjur lai mamla ne ka Tripartite Agreement u snem 2014, kaba hukum ba ki bor pynïaid ki paidbah ha ki jaka sor dei ban aiti sha ki mongïalam shnong (local body) kiba la shah jied, kyrpang ki Autonomous District Councils (ADCs).
U la kdew ba wat hapdeng ka jingïamynjur, ka sorkar ka la pulom ban thaw ïa ka commission ban pule bad ban ai jingmut halor ki rukom treikam ki jingpynïaid kam.
U Marak u la pynpaw ba ki Town Committee kiba don ha Ampati, Nongpoh, bad Nongstoiñ ki duna ban don ïa ki nongïalam shnong ba la shah jied, ha kaba kane ka la nang ktah shuh shuh halor ka jingshah pynkheiñ ïa ki hok jong ki riewlum.
Na ka liang u Marak u la kyntu ïa ka sorkar ba kan pynsangeh ïa kane ka jingpynkheiñ ïa ki hok jong ki riewlum lyngba ki municipality bad dei ban sdang ki jingïakren ban bujli noh ïa ki da ki nongïalam shnong (local body) ne Town Committee kiba la shah jied hapoh ki ADC. U la kdew ruh ïa ka jingjia ba dangshen ha Tura ha kaba ki nongkhaïi ki la pynpaw ka jingpyrshah ïa ka jinglum khajna kaba beaiñ da ki nongshimwai, ha kaba ka la long kumba leh beiñ pyrshah ïa ki riewlum.
Ka jingkynthoh u MDC ka BJP ka la wanrah sha ka jingpynleit jingmut halor ki kam kiba dangsah la slem ba ïadei bad ki jingtreikam ki municipal ha Meghalaya bad ka jingdonkam ban pynthymmai ban ïada ïa ki hok jong ki riewlum.
