Shillong, Nohprah 02: U Myntri Rangbah ka Jylla Conrad K Sangma hynne ka sngi Thohdieng, u la pynrem jur ïa ka jingkam u Chief Executive Member (CEM) ka Karbi Anglong Autonomous Council (KAAC) u Tuliram Tongkhang, ba ki Khasi-pnar kiba sah ha ka thaiñ Mukroh ki dei ki poiwir bad ki nongbuhai shnong be-aiñ.
Haba kren bad ki lad pathai khubor u Myntri Rangbah u la ong ba ka jingjia ha Mukroh ka dei ka jingjia kaba sngewsih bha bad ka long ruh kum ka jingtynjuh bad ong ba kum kitei ki jait jingkren ki long kiba ym ïahap satia.
“Kum kine ki jingkren kim dei satia ban mih, ngim sngewtynnad ïa kine ki jingkren, kine ki dei ki por ba ngi mad ïa ki jingeh bad kum kine ki jingkren kin nym ïarap ban tem ïa ka jinglong jingman” kren bynñiaw u Myntri Rangbah halor ka jingkren u CEM ka KAAC.
Shuh shuh u la ïathuh ba na ka liang jong u ruh u la ïakren bad u Myntri Rangbah ka Assam u Himanta Biswa Sarma bad ka jingkren ha ka kyrdan jong ki Myntri Rangbah ka dei ka nongrim jong baroh artylli ki Sorkar Jylla halor ka kam pynbeit pud pynbeit sam.
