Shillong Nailur 01: Ka Dorbar Shnong Nongsohphoh, Upper Mawprem, ka la pynrem jur ïa ka jingujor ejahar kawei ka longkmie pyrshah ïa u Secretary ka Shnong Bah Hardy Ryntathiang ba u jrong kti bad ong kane ka dei tang ka jingkynnoh ka bym shisha bad ka bym don nongrim.
Ka Dorbar Shnong Nongshohphoh kala lum ïa ka jingïalang kaba kyrkieh ha ka sngi Saitjaiñ ha ka ïingdorbar ïa kaba la wan ban ïashimbynta da ki nongïalam jongka Seng Kynthei bad Seng Samla Shnong bad kane ka jingïalang ka la pynrem jur ïa ka jingujor ejahar pyrshah ïa u Secretary Shnong da kawei ka longkmie hapoh ka Lumdiengjri Police Station ha ka 21 tarik u Nailar 2024 da kaba shu kynnoh thok ba kala shah ktah kti.
Katkum ka kyrwoh na u Rangbah Shnong, President ka Seng Kynthei bad Seng Samla Shnong Nongsohphoh, kila pynpaw ba u Secretary udei uba la shah jied ha ki nongshong shnong bad uba la ïoh ïa ka jingithuh na u Syiem ka Hima Mylliem bad ka Khasi Hills Autonomous District Council (KHADC) na ka bynta ban pynïaid ïa ki kam shnong kam thaw bad ban pynneh ïa ka shongsuk shongsaiñ ha ka shnong bad kumjuh halor ki kam kiba ïadei bad ki bor sorkar, ki pulit bad kiwei kiwei.
“Katei ka ejahar ka thew tang ïa u Secretary marwei, hynrei la shim ba ka dei ka jingthombor ïa ka Dorbar Shnong Nongsohphoh, Upper Mawprem baroh kawei” la pynpaw ki nongïalam shnong.
“Ka jingujor ejahar kam don eiei hynrei ka dei tang ban ïoh ban ïakhun pyrshah ïa ka ejahar kaba la ujor da u Secretary Shnong ha ka 17 tarik u Nailar 2024 ha kaba u nongkhaïi drok uba don jingïadei bad katei ka nongujor, ula shah kem ha ki nongïalam shnong, Seng Longkmie bad Seng Samla shnong. Ka Dorbar Shnong ka sngew ba katei ka ejahar ka long ka bym don nongrim bad la ujor ïa ka da ka jingthmu ym tang ban pynthohbria ïa u Secretary Shnong hynrei ïa ka Dorbar Shnong Nongsohphoh, UpperMawprem baroh kawei” la pynpaw ha ka kyrwoh.
Ka Dorbar Shnong kala maham tyngeh ba kino kino kiba don jingïadei bad katei ka riewshimet kaba la kynnoh khlem nongrim pyrshah ïa u Secretary bad ïa ka shnong abroh kawei kaba ïengskhem ha ka nongrim ban ïoh ïa ka jingshisha bad ban pynthikna ba kitei ki jingkynnoh kiba khlem nongrim ki dei ban shah shimkhia katkum ki kyndon aiñ.
