New Delhi, Nailur 01: Ka President Droupadi Murmu ka la pynpaw ïa ka jingsngewkhia haba ïadei bad ka jingduna ka jingïoh jingkyrshan na ka liang ka imlang sahlang ïa ki longkmie kiba la lait im na ki kam shah thombor pyrshah ïa ki.
Kane ka jingkynthoh jong ka President jong ka ri ka la long hadien ba la mih bun ki jingshah thohmbor pyrshah ïa ki longkmie hapoh ka ri. Ka jingshah leh beijot bad shah pynïap jong ka doktor ha Kolkata hospital, bad kiwei pat ki kam shah thombor kiba ktah ïa ka long rynïeng jong ki longkmie ki la jia ha kiba bun ki jaka jong ka ri ha kaba ïa kane dei ban shim khia lang da baroh.
“Ka long kaei kaei kaba sngewsih ba wat hadien ba ki la leh ïa kane ka kam thombor, kine ki runar ki dang ïoh ka lad ban ïaid laitluid khlem jingtieng. Kito pat ki lanot kiba ngat ha kane ka kam ki im ha ka jingtieng. Ka jinglong jingman jong ki longkmie ka la nangjur naba ki briew ha ka imlang sahlang kim ai ka jingkyrshan ïa ki,” ong ka President Murmu haba kren ha ka National Conference jong ki District Judiciary kiba rakhe ïa ka jingdap 75 snem jong ka Supreme Court.
Ka la kyntu ruh ïa baroh ki nongshong shnong ban ïatreilang ban ïakhun ïa kine ki jingeh kiba mih ha ka imlang sahlang bad kiba la wanrah ruh ka jingeh ïa ka ïingkashari.
“La ïathuh ïa nga ba ha ki por ba la leit ki la don ki lad kiba ïarap ha kaba ïadei bad kane ka bynta. Hynrei ka dang donkam bun pat ban leh eiei halor kane ka bynta. Nga ngeit ba kan don ka jingkylla kaba donkam ban pynthymmai ha kaba ïadei bad kane ka bynta,” ka la ong.
“Nga kmen ban tip ba ki la don bun ki longkmie kiba don hapoh ki selection committee ha kine ki snem ba la leit noh. Da kane ka la kyntiew kumba 50 per cent ka jingdon ki longkmie ha ki selection committee,” ong ka President Murmu.
Na ka liang ka Supreme Court ka la pynlong ïa kane ka National Conference ba 2 sngi jong ki District Judiciary ha ka 31 Nailar bad kumjuh ruh ha ka 1 Nailur bad kumba 800 ngut ki la wan ban ïashim bynta na ki district judiciary jong baroh ki jylla bad ki Union Territory.
Ha kane ka sngi nalor ka President la wanruh ban ïashim bynta da u Myntri ka sorkar pdeng ba khmih ïa ki kam aiñ u Arjun Ram Meghwal nalor kiwei pat ki kynrem ki lyndan.
