Shillong, Rymphang 27: Ka North East Students’ Organization (NESO) ka la pynrem jur ïa ka jingpynbthei bom kaba la jia ha ka 23 tarik mynta u bnai ba phyllaw jong ka AII Manipur Students’ Union (AMSU) kaba don ha DM University Campus, Thangmeiband, Imphal, kaba lam sha ka jingkhladnoh jong uwei u samla uba la tip kyrteng kum u Oinam Kenejy,
uba pule ha DM College katba uwei pat uba la mynsaw jur uba la tip kyrteng kum Salam Michael uba pule ha DM College.
Ha u kyrwoh, u Chairman jong ka Organisation u Bah Samuel Jyrwa u la ong ba ka NESO ka pynpaw ïa ka jingsngewkhia halor kine ki jingjia khamtam hadien ka jingshah wiang ding jong ka ophis treikam UCM kynthup ïa ka Macha Leima School, ka jingpynjulor ïa kiwei kiwei ki ophis treikam jong ki kynhun sengbhalang, ka jingpynjot bad pynjulor ïa ka ingsah jong u Sinam Prakash uba dei u Advisor jong ka NESO.
U la ong ba ka AMSU ka dei kaba kiar ïalade ban ïadon bynta bad ka saiñpyrthei bad kam pat ju don bynta ruh ha kano kano ka jingïaumsnam la ka long ha kano kano ka dur.
“Ha kum kane ka por, ka long kaba donkam ïa ki paidbah ban kdew lynti bad ban pynthikna ba ka AMSU kan ïai bteng ban long ka kynhun ka bym don bynta ha ka saiñpyrthei hynrei ban pynlong ïa ki jingïakhih ki bym ïaumsnam. Kine ki jingjia, ki la pynkulmar jingmut bad pynsyier mynsiem ruh ïa ki samla pule bad kumjuh ruh ïa ki paidbah,” ong u Bah Jyrwa.
U la ong ba ka NESO, ka khot bad wer ban wanrah biang ïa ka jingshongsuk bad ha kajuh ka por u la kyntu ïa ka Sorkar ba kan shimkhia ïa kine ki jingjia bad ban pynneh pynsah ïa ka shongsuk shongsaiñ bad ban kem ïa ki nongleh kam bymman.
“Naor kata, ka Sorkar ka dei ban bteng ban wanrah ïa ka shongsuk bad ha kajuh ka por ban shimkhia ban pynlong ïa ka jingïakren bad baroh ki seng kieng atiar khnang ban ïada ïa ki jaidbynriew ritpaid jong ka jylla Manipur ba ka jingsuk kan long kaba neh junom,” ong u Chairman ka NESO.
Ha u snem baladep, ka NESO ka la pynsdang ïa ka mishon jingsum ha ka jingïaumsnam ha Manipur, bad kan, dang ïai bteng ïa kane ka mishon da ka jingshimkhia lang jong ki kynhun bapher bapher na ka bynta ka shongsuk shongsaiñ ha ka jylla Manipur..
