Shillong, Naitung 20: U Myntri Rangbah ka jylla, Conrad K Sangma ha ka sngi Palei u la pynrem jur halor ka jingthombor ïa ka longrynieng jongki longkmie ha ka jylla Manipur.
Da kaba pynpaw ba katei ka jingjia kadei ka bym lah satia ban pdiang, u Myntri Rangbah u laong ba un sa thoh ruh sha u Myntri Rangbah ka Manipur bad ruh sha u Myntri Rangbahduh ka Ri kumjuh sha u Myntri Kampohiing ka Ri ba ki dei ban pynshitom tyngeh ïa kitei ki nongkam bymman.
“Kadei ka jingjia kaba ym sngewtynnad bad kam dei ruh ban jia kumta ka sorkar kadei ban pynshitom ïa baroh kito kiba donkti ha katei ka kam. Nga ban biang ba kane kadei ka jingjia ka bym lah satia ban pdiang bad dei ban leh da kaba tyngeh ïa kito kiba donkti,” u la ong haba kren bad ki lad pathai khubor ha kane ka sngi Palei.
Katei ka jingkren jong u Myntri Rangbah kadei hadien ka jingphriang ki video kiba pyni ïa ka jingshah thombor ki longkmie ha Manipur ha ki paidbah.
Shwa kane, u Myntri Rangbah u la pyntip ba u dep ruh ban thoh sha u Myntri Rangbahduh ka Ri bad ruh sha u Myntri Kampohiing shibnai mynshwa haba ïadei bad ka jinglong jingman ha katei ka jylla.
“Nga la thoh sha ki ym kum u Myntri Rangbah hynrei kum u nongïalam jong ka party,” u la bynrap biang.
