Shillong, Jylliew 28: U Myntri Rangbah ka jylla u Conrad K Sangma ha ka sngi Thohdieng u la pynrem jur halor ka jingshah shoh tohmet jong kawei ka kynthei ha West Garo Hills District bad u la pynthikna ban pynshitom jur ïa ki runar kiba donkti ha kane ka kam.
“Ngi pynrem ïa kum kine ki jingleh, bad kino kino kiba donkti halor kane ka kam kin ym lait na ki jingshah pynshitom,” ong u Sangma haba kren sha ki lad pathai khubor.
“Kaei kaba ki leh ka dei kaba bakla. Lada ka don kano kano ka mat, kano kano ka jingsngew khia ne kano kano ka jingeh dei ban ïaid katkum ka aiñ bad ym dei ban shim ïa ka aiñ ha ki kti lajong bad kane ka dei ka kam kaba ki la leh bakla bad kin ym lait na ki jingshah pynshitom khamtam kito kiba donkti ha kane ka jingleh bymman,” u la ong.
Ha kaba ïadei bad kane kumba ka long haduh mynta na ka liang jong ki pulit ki la kem haduh 5 ngut ki briew kiba la kynnoh ba ki la donkti halor kane ka jingshoh ïa katei ka longkmie.
