Shillong, Jylliew 28: Da ka jingthmu ban kynjoh ïa ki jingmut jong ka Swachh Bharat Mission ban pynlong ïa ka ri kaba khuid, kaba lait na ka jingbret jaboh pathar, ka kynhun jong ka PMU jong ka Swachh Bharat Mission Urban Meghalaya ha ka jingïatreilang bad ka ophis Shillong Municipal Board ka la pynlong ïa ka workshop cum training programme kaba shi sngi na ka bynta ki nongtrei Sanitation, ha Marten.
Kiba la donlang ha kane ka prokram ki kynthup ïa u Prafulla Kr. Boro, MCS, Director ka Urban bad CEO jong ka Shillong Municipal Board, u Bah F.B Chyne, Executive Engineer jong ka Shillong Municipal Board bad ka kynhun jong ka PMU Swachh Bharat.
Ki la don kumba 250 ngut ki nongñiah kali bad ki kiwei pat kiba la shim bynta kynthup ïa ki nongmihkhmat na ka Shillong Municipal Boards bad kumjuh ruh na ka Cantonment Board bad na ki shnong bapher bapher jong ka Shillong Urban Agglomeration (SUA), nalor kiwei kiwei pat.
U Prafulla Kr Boro, MCS, Director of Urban bad CEO ka Shillong Municipal Board u la pynpaw ïa ka jingdonkam bad ka bynta kaba khraw jong kiba ñiah kali ban long kiba leh khuid bad ban pynlong ïa ka sawdong sawkun kaba koit ba khiah. U la banjur halor ka jingdonkam ban ym bret pathar ïa ki ñuit ha kaba kane kam dei ruh tang ban bud ïa ki kyndon hynrei ban don ruh ïa ka jingkitkhlieh.
U la ong ba lada baroh ki trei bad don ka jingkitkhlieh ka Nongbah Shillong kan lah ban long kawei na ki nongbah bakhuid jong ka India. Kane ka jingai jinghikai ka la long ruh ban pynsngewthuh ïa ki paidbah ban long kiba leh khuid kaba dei ruh ban bud ïa ka Solid Waste Management Rules 2016 bad ka Meghalaya Waste Management Bylaws 2016. Ha kane ka Workshop ka la don ruh ka jingbatai kumno ban phiah ïa ki ñuit kiba pyut bad ki bym pyut.
