Shillong, Jylliew, 28: Ban plie lad ïa ki jingïatreilang, ban kyntiew ïa ka jingseisoh jong ki kam bad ban pyntyllun shakhmat ïa ka thong kiba ka ri India bad ka Bangladesh ki don na ka bynta ban pynkhlaiñ shuh shuh ïa ki jingïatreilang ha ka jingpyntreikam ïa ki tnat Customs, ka kynhun ki saw ngut ki dkhot na ka ri Bangladesh ba la khlieh da u Commissioner, Customs, Excise & VAT Commissionerate, Jashore u Md. Kamruzzaman bad kynhun ba 10 ngut na ka ri India ba la khlieh da u Commissioner of Customs Preventive Commissionerate, NER, Shillong M. Rahman ki la ïakynduh lang ha ka jingïalang Commissioner level India-Bangladesh Joint Group of Customs kaba hynñiew ha nongbah Shillong ha ka 27 tarik bad 28 tarik mynta u bnai.
U khliehduh jong ka kynhun na Bangladesh u la pynpaw ka jingsngewnguh ïa ka tnat Customs na ka ri India kaba la pynlong ïa kane ka jingïalang bad kaba la pynthikna ba ki jingïakren ki wanrah ïa ki jingseisoh.
Ïa ki jingai jingmut jong kane ka jingïalang la ïasoi da baroh arliang hadien ba la poi sha ka jingïasngewthuh jingmut shaphang katto katne ki kam kiba ïadei bad ki kam khaii bad ki rukom treikam ki tnat Customs hapdeng ki artylli ki ri.
Kane ka jingïalang ka long kum u mawmer ha ki jingïadei hapdeng ka India bad Bangladesh ha kaba la paw shai ka jingïatreilang ban kyntiew ïa ka jingplie lad ïa ki kam khaii pateng bad ki jingïatreilang hapdeng kine artylli ki ri.
Kine ki jait jingïakren kiba seisoh ki long kiba kongsan bha na ka bynta ka jingpynkhlaiñ bad ka jingpynseisoh ïa ki kam khaii pateng, ka jingkyntiew ïa ka ïoh ka kot bad ka jingriewspah.
La rai ban pynlong manla ka por ïa kine ki jingïalang ha ki kyrdan Commissioner Level hapdeng ka ri India bad ka ri Bangladesh.
