Shillong, Risaw 19 : Ka Shillong Press Club, ka la pynrem jur ïa President ka Voice of the People Party (VPP) bad MLA ka Nongkrem u Bah Ardent M Basaiawmoit uba la kynthoh pynjah burom bad kynnoh khlem nongrim ïa ki nongthoh khubor bad lad pathai khubor haba dawa ruh ba u dei ban panmap mardor lym kumta ki lad pathai khubor kin shim ïa kiwei ki lynti ba long pyrshah ïa u bad VPP.
Kane ka jingpynrem ka Shillong Press Club, kaba dei ka Club jong baroh ki nongthoh khubor bad lad pathai khubor, ka la shim khia jur halor ka jingkynnoh une u Nongialam ka VPP ba ong ba ki lad pathai khubor hangne ki ai khubor thok bad ki nongthoh khubor ka Jylla ki dei kiba shah thied ban thoh khubor.
“Ka long kaba sngewsih ba u Nongthaw Aiñ bala shemphang bha,un pynmih ïa kum kane ka jingkynnoh ba khlem nongrim ïa ki nongthoh khubor halor ka nongrim ba ki ai khubor thok bad kynnoh ruh ba ki nongthoh khubor ka jylla ki dei kiba shah thied ba kin thoh khubor” ong ka kyrwoh ka SPC ba la soi da u President Bah David Laitphlang bad General Secretary Powell Sohkhlet.
“Ka long ruh kaba kyndit ban ïohsngew ba ula kren sha ki paidbah ba ki lad pathai khubor hangne ki leit lum khubor ïa ki jingïalang ka VPP tang ban ïoh kdew bad wad daw bad jingduna kiba don ha ka party” ki la bynrap.
Ka SPC ka pynkynmaw ïa u Bah Ardent ba ka dei ka kamram jong ki nongthoh khubor ka long ban lum jingtip ba kynthup ïa kaba bha ne kaba sniew, kaba shong kat kum ki jingshisha ym ki hamsaia ne khana lorni.
“Ka SPC ka kwah ïa u Bah Ardent ban kren shai la ka VPP ka khmih lynti tang ïa ki jingtip bad ki khubor ba rahskong ïa ka VPP lane la ka VPP ka kwah tang ïa ki briew kiba hap ha ka thup jong kine ki jingkynnoh jong u (ba thied pisa) ba kin wan lum ïa ki khubor ka VPP nangne shakhmat” kila ong.
Ka SPC ka kwah ruh ban pynkynmaw ïa u Bah Ardent ba ka jingbha ka result jong ka VPP ha ka elek shon bala dep ka wan ruh na u synñiang jong ki lad pathai khubor kiba la pynsaphriang ïa ki khubor ha man ki rynsan pathai khubor.
“Hato kane ka pyni ba baroh kito ki nongthoh khubor ba lum khubor na ki jingïalang ka VPP ha ka elekshon bala dep ki dei kiba la siew da ka pisa lane pynbiej ha kino kino ki dur haduh ban ïoh haduh 4 tylli ki seat (4 ngut ki MLA) ïa ka party ba dang thymmai hapoh ka jylli saiñ pyrthei ka Jylla” ong kine ki Nongïalam ka SPC.
Namar kane ka jingkynnoh, ka SPC ka la dawa ïa u Bah Ardent ba un ai ïa ki kyrteng jong ki nongthoh khubor kiba la ïaid bakla ha ka jingtreikam da ka lynti ka bym dei na ba ka jingkynnoh kyllum lang ïa baroh ka long pyrshah ïa ka jinglong laitluid bad jingbym shah liang ha ka kam thoh khubor ïa kaba ka SPC bad baroh ki lad pathai khubor ka Jylla ki la pyrshang katba lah ban bud.
Kine ki Nongïalam ka SPC ki la ong ba ka jingkynnoh kyllum lang ïa baroh ym tang ba ka dei ka kam biej hynrei ka dei ruh ka jingpynjah burom pyrshah ïa ki nongthoh khubor ka Jylla.
“Namar kata, ngi dawa ïa ka jingpynshai kaba biang bad ka jingpanmap, lym kumta kan pynbor ïa ka SPC ban shim ïa kiwei pat ki lynti” pynkut ka kyrwoh.
