Nongpoh, Nailur, 06: Da ki spah tylli ki dukan bad ki ïing ba la shna beaiñ ki la shah pynpra noh ha ka sorkar Assam kata naduh na Jorabad sha Byrnihat, kaba dei hadien ba ki la shu shna ïa ki dukan bad ki ing khlem da don ki kot ki sla bad ruh ba la shu wan sah beaiñ.
Ki bor sorkar ka Assam mynta ka sngi ki la hiar sha 15mer, kaba dei ka jaka ha khappud ka Meghalaya bad Ri Bhoi, ha kaba ki la pyndonkam syndon da ki Kor Puhshilum ban pynpra ïa kitei ki dukan bad ki ing ba la wan sah ne shna beaiñ ha katei ka jaka sorkar.
Ki bor Pulit, ki CRPF bad ki Magistrate ki la hiar sha katei ka jaka na ka bynta ban pahara katba ka kor puh shilum ka dang pynpra naphang ïa kitei ki dukan bad ki ing na la shu wan shna beaiñ.
La ïohi ruh ba ha kane ka jingpynpra ïa kitei ki dukan bad ki ïing ym lah shuh ban ithuh ithaw ïa ki trai, ha kab ki bor sorkar ka Assam ki la pynpra naphang haduh ba katei ka jaka ka la kylla madan, khamtam ba ka don harud ka surokbah National Highway-6 kaba dei ha khappud ka Meghalaya bad ka Assam.
Uwei na u nongshong shnong na 13mer u Ringku Deka, u la ai ka jingïaroh ïa ka sorkar Assam kaba la nud ban pynpra naphang ïa kitei ki dukan bad ki ïing, namar baroh kitei ki dei kiba la shu wan shong beaiñ bad shim kabu ban shna dukan ne ki ïing ha ki jaka jong ka sorkar Assam.
U la ïathuh ruh ba ki don ki briew kiba shim kabu da kaba khrong pisa kata T.50 haduh T.200 kawei ka dukan da kaba kam ba ki ïoh tender na ka sorkar bad phewse kine baroh ki dei tang ki kam shim kabu, ha kaba katei ka jaka ka dei jong ka sorkar bad la shu wan shong ne sah beaiñ ban shna ïa ki dukan khlem da long trai ïa katei ka jaka.
U la bynrap ruh da kaba ong ba ka sorkar ka la leh ïa kaba bha tam ban pynpra ïa kitei ki nongshong beaiñ, namar dei lyngba ka jingwan shonbeaiñ tang shu slap la don ka jingshlei um, namar ïa ka nala um la tap da ki dukan bad ki ïing ba man ka por ka ju wan ka jingshlei um ha Jorobat ter ter shaduh sha Byrnihat ha ka liang jong u pud u sam ka jylla Assam.
