Pan pisa ka Sorkar Jylla na ka Sorkar Pdeng ban tei Veterinary Hospital ha Upper Shillong

Shillong, Nailur, 06: U Myntri ka Sorkar Jylla uba khmih ïa ka tnat Animal Husbandry & Veterinary Bah AL Hek ha ka sngi Thohdieng u la pyntip ba ka Sorkar Jylla ka dang ap ktien ïa ka jingmynjur bad ïa ka jingmang pisa da ka Sorkar Pdeng ban tei ïa ka Veterinary Hospital kaba la khmihlynt la slem bha ha Upper Shillong.
Ha ka jingïakren bad ki lad pathai khubor u Bah Hek u la ong, “ngi dang ap ïa ka jingmynjur bad ïa ka mang pisa. Dang shen ngi la phah ïa ka jingtyrwa kaba T. 32 klur hynrei ynda la khmih bniah biang ia ka projek, ngi la rai ban phah ïa ka jingtyrrwa kaba T.100 klur, kaba ha ka jingshisha ka dei hi ka jingtyrwa ban tei ïa ka hospital.”
Ka thymmei khubor ka ïathuh ba ïa ka jingtyrwa jong ka Sorkar Jylla la khmih bniah da ka NITI Aayog bad ka Ministry of Animal Husbandry and Dairying , ka Sorkar India.
Ha ka jubab ba la ai dang shen ha ka Dorbar Synrai jong ka Iingdorbar Thawaiñ ba la kut dang shen, u Bah Hek u la ong, “ka jingbuh por ban pyndep bad ban pyntreikam ïa ka Veterinary Hospital ha Upper Shillong, ym pat lah ban pynthikna, namarba ka tnat ka dang ap ïa ka jingmang pisa bad ïa ka jingmynjur da ka Ministry of DoNER hapoh ka PM-DeVINE, bad namarba ka jingtyrwa ka dang don hapoh ka jingeksamin, da ka NITI Aayog bad ka Ministry of Animal Husbandry and Dairying, ka Sorkar India.”
Shuh shuh, u Myntri u la pyntip ba ïa ka jingtyrwa ban tei ïa ka Veterinary College ha Kyrdemkulai, Ri Bhoi District la dep phah sha ka Sorkar Pdeng.
Katkum ka jingong jong u, palat 800 akar ka don ka jaka bad ka sorkar ka la ai jaka katkum ka jingdonkam ban tei ia ka College.