Nongstoiñ, Risaw 24 : Kum shibynta ban ai jingkyshan lem ïa kiba duna dkhot met ka seng HNYF Mawthawñiaw Diskiang Unit, ka la pynlong da ka jingïalehkai football na ka bynta ban pynmih pisa bad ban synñiang lem sha ki, kaba long ruh kum ka dak jong ka jingai mynsiem ïa kiba donkam hok ïa ka jingïarap.
Ïa katei ka jingïalehkai la ïoh ban khang pyrda noh da u samla Skhemdingwell Mawlieh working president ka Nongstoiñ Assembly Youth Congress ha ka jingïadonlang u bah B.Marbaniang President HNYF West Khasi Hills District, bah Crefitstone Syiemlieh President HNYF Mawthawñiaw Diskiang Unit, u bah Nabarlin Wanñiang Secretary ka shnong Diskiang bad kiwei kiwei ki dkhot ka seng HNYF.
Ha ka sngi final ka Jyrwa FT Mawthawñiaw ka la ïoh ban rah ïa ka nam jop, hadien ba ka la ïoh ban pynbam haduh 2 la nod pyrshah ïa ka M. Junior Football Team Mawkhmahwir Pyndengrei.
Kaba kham sngew tynnad ban tip ka long ba ka Jyrwa FT hadien ba ka la ïoh ïa ka khusnam ka shim noh tang ïa ka trophy, katba ïa ka song pisa ka la pynphai noh pat sha ki nongpynïaid ba kin pynsam lem sha kiba duna dkhot met.
Ïa kane la pynbna da u bah Bony Jyrwa u ba lamkhmat ïa katei ka kynhun bad kane ka jingleh jong katei ka kynhun, ka la pynkyndit ïa ki paidbah khamtam ki nongpynïaid, namar kum kane kam pat ju jia mynno mynno ruh bad ka la long ka sien kaba nyngkong ha ka thaiñ.
